Astanada kelesi jyly 10 balabaqsha qoldanysqa beriledi - Á. Bımendına
ASTANA. 30 qarasha. QazAqparat - Jańa jyldan keıin Elordanyń Almaty aýdanynda jańa «Shuǵyla» balabaqshasy ashylady. Búgin oǵan Astana qalasy Bilim basqarmasynyń bastyǵy Ásıma Bımendına bardy.
Balabaqsha 240 balaǵa eseptelgen. Mektepaldy daıyndyqty qosa eseptegende onda 12 top bolady. Bilim basqarmasy bastyǵynyń aıtýynsha, jańa balabaqshaǵa balalar 2013 jyldyń qańtar aıynan bastap bara alady.
Oqý-tárbıe úderisin uıymdastyrýǵa pedagog-tárbıeshiler, psıholog, mýzyka oqytýshylary, sport nusqaýshylary tartylǵan. Sondaı-aq, balalarǵa dene tárbıesi-saýyqtyrý, jumystaryn ótkizýge ujym shtatynda dáriger-pedıatr, fızıo-medbıke jáne dıetmedbıke qarastyrylǵan.
Búgingi kúni Astana qalasynda 52 jekemenshik, 69 memlekettik mektepke deıingi bilim berý mekemesi bar. «Prezıdent Nursultan Nazarbaevtyń tapsyrmasy boıynsha qolǵa alynǵan «Balapan» baǵdarlamasy búginde qarqyn alyp kele jatyr. Osy baǵdarlama aıasynda 2013 jyly taǵy da 10 balabaqshany iske qosý josparlanǵan. Balabaqshaǵa degen defıtsıt jyldan jylǵa azaıyp keledi. Degenmen qalamyzǵa elimizdiń túkpir-túkpirinen kóship kelýshilerdiń kópitiginen balabaqsha kezeginde turǵandardyń sany 65 myńnan asyp otyr», - dedi Ásıma Bımendına.
