Astanada kekýshın býdokaı karate týrnırine 600-den asa sportshy qatysady

ASTANA. KAZINFORM — Astanada «Zań men tártip» qaǵıdaty aıasynda, sondaı-aq esirtki qylmysyna qarsy kúres sheńberinde 14 jáne 15 aqpan kúnderi jyl saıynǵy dástúrli Astana OPEN VI kekýshın býdokaı karate týrnıri ótedi, dep habarlaıdy qala ákimdiginiń resmı saıty.

Týrnır quqyq buzýshylyqtardyń aldyn alýǵa, jastar arasynda tártiptilik, jaýapkershilik pen salaýatty ómir saltyn qalyptastyrýǵa baǵyttalǵan «Astana — esirtkisiz qala» áleýmettik mańyzy bar jobasy jáne «Zań men tártip» qaǵıdaty aıasynda uıymdastyrylady.

— Jarysqa ártúrli baǵyttaǵy úzdik sportshylar qatysady, al is-shara qalanyń sport kúntizbesindegi mańyzdy oqıǵalardyń biri bolmaq.  Sportshylar Kata jáne Kýmıte boıynsha sheberlikterin kórsetedi. 600-den astam qatysýshy tatamıge shyǵýǵa nıet bildirgen. Bıyl týrnırge Qazaqstannyń 15 óńirinen ókilder qatysady, — delingen habarlamada.

Jarysty Astana qalasynyń «Kekýshın Býdokaı Karate federatsııasy» qoǵamdyq birlestigi, qalalyq Polıtsııa departamentiniń Esirtki qylmysyna qarsy is-qımyl basqarmasy, sondaı-aq elordalyq Dene shynyqtyrý jáne sport basqarmasy uıymdastyrady.

Týrnırdiń resmı ashylýy 15 aqpan kúni saǵat 16:00–de Ahmet Baıtursynuly kóshesi, 18 mekenjaıynda ornalasqan Bekzat Sattarhanov atyndaǵy sport kesheninde ótedi.