Astanada «Kekilbaev tulǵasy» kitabynyń tusaýkeseri ótti
ASTANA. KAZINFORM - 2026 jylǵy 15 sáýirde Qazaqstan Respýblıkasy Memlekettik basqarý akademııasynda qazaq rýhanııatynyń kórnekti ókili, Qazaqstannyń Eńbek Eri, memleket jáne qoǵam qaıratkeri, kórnekti jazýshy Ábish Kekilbaıulynyń ómiri men qyzmetine arnalǵan «Kekilbaev tulǵasy» kitabynyń tusaýkeser rásimi ótti.
Іs-sharanyń maqsaty — Ábish Kekilbaıulynyń ónegeli ómir jolyn memlekettik qyzmetke qyzyǵýshylyq tanytatyn jastar arasynda nasıhattaý, onyń tulǵalyq jáne kásibı murasyn dáripteý. Tusaýkeser rásimine jazýshynyń urpaqtary, memleket jáne qoǵam qaıratkerleri, zııaly qaýym ókilderi, Qazaqstan Respýblıkasy Parlamentiniń depýtattary, sondaı-aq memlekettik organdardyń ókilderi qatysty.
Qazaqstan Respýblıkasy Memlekettik qyzmet isteri agenttiginiń tóraǵasy Darhan Jazyqbaı quttyqtaý sózinde memlekettik qyzmetshilerdiń tulǵalyq áleýetin damytý baǵytynda «Tulǵataný» jobasy aıasynda júıeli jumystar júrgizilip kele jatqanyn atap ótti.
Agenttik tóraǵasy óz sózinde Qazaqstan Respýblıkasynyń Prezıdenti Qasym-Jomart Toqaevtyń Ábish Kekilbaıuly týraly pikirin keltirdi:
«Ábish Kekilbaıuly naǵyz taý tulǵaly azamat edi. Ol ishki mádenıeti óte joǵary jan bolatyn. Onymen tildesken adamdar rýhtanyp, qanattanyp shyǵatyn. Bir sózben aıtsaq, Ábish Kekilbaıuly naǵyz zııaly adam, kemeńger tulǵa boldy».
Sondaı-aq Ábish Kekilbaıulynyń ómir joly shyǵarmashylyq pen memlekettik qyzmetti qatar alyp júrýimen erekshelenetinin aıtty. Ol Qazaqstan Joǵarǵy Keńesiniń tóraǵasy, Memlekettik hatshy, Parlament depýtaty retinde el damýyna eleýli úles qosyp, memlekettik basqarý júıesin nyǵaıtýǵa qyzmet etkenin aıryqsha atap ótti.
Kitapta Ábish Kekilbaıulynyń ómiriniń ár kezeńi, shyǵarmashylyq jáne qoǵamdyq-saıası qyzmeti, tulǵalyq qalyptasý joly jan-jaqty qamtylǵan. Sonymen qatar, onyń adamgershilik qasıetteri, kúrdeli kezeńderde sheshim qabyldaýdaǵy kóregendigi, memleketshildik ustanymy, el birligi men qoǵamdyq kelisimdi nyǵaıtýǵa qosqan úlesi keńinen baıandalady. Jınaqqa zamandastarynyń estelikteri, pikirleri men tarıhı derekter engizilgen.
Kitap avtorlary — Ulan Aıhoja men Abaı Seıfýlla.
Atalǵan joba Qazaqstan Respýblıkasy Memlekettik qyzmet isteri agenttiginiń «Tulǵataný» baǵyty aıasynda júzege asyrylyp otyrǵan jumystardyń jalǵasy. Buǵan deıin osy bastama sheńberinde jaryq kórgen «Saparbaev tulǵasy» kitaby oqyrmandar tarapynan oń baǵasyn alǵan. Al «Kekilbaev tulǵasy» kitaby osy rýhanı sabaqtastyqtyń zańdy jalǵasy.
Aıta keteıik, osyǵan deıin Ábish Kekilbaevtyń ómiri men shyǵarmashylyǵyna arnalǵan entsıklopedııanyń 3-tomy jaryq kórgen bolatyn.
