Astanada qazirgi zamanǵy óner sheberleriniń «ArtDala» atty biregeı kórmesi ótedi

Sheberlerdiń qolóner buıymdary búgingi kúnderi de óz mańyzdylyǵyn joǵaltpaı, halyq arasynda árqashan da tanymal jáne úlken suranysqa ıe bolyp keledi. Olar joǵary sapasymen qatar oryndalý máneri, dara kórkemdiligimen erekshelenedi. Qoldanbaly óner sheberleri buıymdardy daıyndaýda qazirgi zamanǵy  túrli materıaldar men ózindik tehnologııalardy tıimdi ushtastyrýǵa den qoıady. Atalǵan kórmede beıneleý jáne qoldanbaly ónerdiń ártúrli janrlary keńinen qamtylǵan. Atap aıtqanda, otandyq qylqalam sheberleriniń týyndylarynan quralǵan ekspozıtsııada fotoart, kórkemsýret, grafıka, nysandar, ınstallıatsııa syndy qazirgi zaman óneriniń túrleri usynylmaq.  

Árbir sýretshiniń shyǵarmashylyǵyn halqymyzdyń qazirgi ómirinen salynǵan ulttyq aıshyqtar, qazaqtardyń kúndelikti tirshiliginiń, tabıǵattyń, turmystyń kórkem kórinisteri, keskindemelik tildiń shýaqty jarqyn boıaýlary, oıdyń paıymdyq tolǵamdary, tústik sheshimderdiń qanyqtylyǵy jáne ózge de alýan syrly, syndarly sıpattar aıshyqtaıdy.

Smaıl Baıálıev , Saıd Atabekov syndy sheberlerdiń ónerleri qazaq halqynyń tabıǵatpen baılanysyn kórsetedi. Qazirgi zaman adamdarynyń halyqtyq saltpen aradaǵy baılanysy - kórmeniń negizgi taqyryby bolmaq.

Uıymdastyrýshysy - QR Mádenıet jáne aqparat mınıstrliginiń Mádenıet komıteti. Kórme 12 qazan kúni Astanadaǵy «Kórme» kesheninde ótedi.