Astanada QAJ qyzmetkerleri soǵys ardagerin 95 jyldyǵymen quttyqtady (FOTO)

ASTANA. QazAqparat - Jeńistiń 70 jyldyǵyn merekeleýge oraı QAJ Ardagerler keńesi men elordalyq QAJ departamentiniń qyzmetkerleri 95 jasqa tolǵan Uly Otan soǵysynyń ardageri jáne burynǵy áriptesi Andreı Fedorovıch Chetverıkovpen kezdesti, dep habarlady Astana qalasy boıynsha QAJ departamentinen.

Soǵystan keıin 1945 jyldyń aqpan aıynan 1971 jyldyń shildesine deıin Andreı Fedorovıch ishki ister organdarynda qyzmet atqarǵan. Qurmetti demalysyna Aqmola oblysy Stepnogor qalasyndaǵy kolonııa bastyǵynyń kezekshi kómekshisi qyzmetinde shyqty. A.Chetverıkov Otan soǵysy men Qyzyl juldyz ordenderimen, Germanııany jeńgeni úshin, Máskeýdi qorǵaǵany úshin jáne t.b. medaldarmen marapattalǵan.

«Astana qalalyq QAJ departamenti Ardagerler keńesiniń tóraǵasy Jańaómir Jamalov quttyqtaý barysynda ardagerdiń soǵys jyldaryndaǵy erlik jolyn atap ótip, oǵan densaýlyq pen uzaq ómir tiledi. Sóz sońynda J.Jamalov Andreı Fedorovıchke «Qazaqstan Respýblıkasy Іshki ister mınıstrliginiń qurmetti ardageri» medalin, Іshki ister mınıstri Q.Qasymovtyń gramotasyn jáne aqshalaı syılyǵyn tabystady», - dep atap ótti Astana qalalyq QAJ departamentinen.