Astanada «Qazanat» kitabiniń úshinshi shyǵarylymy tanystyryldy
ASTANA. 13 sáýir. QazAqparat /Jasulan Amanbaıuly/ - Ystambul qalasynda jaryqqa shyqqan at sporty men jylqy sharýashylyǵynyń búgingi jaı-kúıine arnalǵan «Qazanat» kitabi búgin Astana jurtyna tanystyryldy.
Onyń avtorlary elimizdegi at sporty men jylqy sharýashylyǵynyń bilikti janashyrlary sanalatyn Keńes Raqyshev pen Sádibek Túgel.
Bes bólimnen turatyn bul kitap jylqynyń qadir-qasıeti týrasynda el aýzynda aıtylyp kelgen ańyz-áńgimelermen birge jylqy malynyń bıologııalyq erekshelikteri men tuqym túrleri, respýblıkada atalǵan salany órkendetý men at sportyn damytýdyń naqty múmkindikteri jan-jaqty saralanyp kórsetilgen.
Osymen úshinshi márte basylyp shyqqan eńbek, mamandardyń aıtýynsha, búgingi kúni búkil qazaq atbegileriniń qolynan túspeıtin, qasterlep oqıtyn shejiresine, entsıklopedııasyna aınalyp úlgerdi. Jalpy alǵanda «Qazanat» kitabynyń oqyrmandarymen qaýyshqanyna bıyl 5 jyl boldy.
Avtorlar Ór Altaıdan - Atyraýǵa, Ulytaýdan - Alataýǵa deıin sozylyp jatqan Uly dalany, qasıetti baıtaq jerimizdi batyr babalarymyz jáı attyń ústinde emes, qazaqtyń qus tistegen sáıgúligi - Qazanatynyń ústinde júrip qorǵaǵanyn tyń derektermen ádemi sýretteı bilgen. Sondaı-aq munda arheolog Zeınolla Samashev Berel qorymynan tapqan on úsh jıren aıǵyr týraly tushymdy dáıekter tabylady.
Kitaptyń tırajy 3000 dana, kólemi 200 bet, atalǵan entsıklopedııalyq týyndyǵa 323 fotosýret paıdalanylǵan.
