Astanada qazaqtyń ulttyq mádenı qundylyqtaryn saqtap, damytý máseleleri talqylanýda

«Táýelsiz Qazaqstannyń ulttyq mádenı qundylyǵy» taqyrybyndaǵy dóńgelek ústel otyrysyna tanymal mádenıet jáne qoǵam qaıratkerleri, tarıhshylar, memlekettik organdar men úkimettik emes uıymdardyń ókilderi qatysýda.

Fılologııa ǵylymdarynyń doktory, Shyńǵyshan Halyqaralyq akademııasynyń akademıgi Qarjaýbaı Sartqojauly atap kórsetkendeı, Qazaqstanda «Mádenıet týraly», «Tilder týraly» zańdar men ulttyq qundylyqtarymyzdy, dástúrimiz ben mádenıetimizdi saqtap, qaıta túletýdi maqsat tutqan kóptegen basqa da zańnamalyq qujattar qabyldandy. Endi solardy negizge ala otyryp jumys jasaý qajet.

«Qandaı jumys istesek te erkindik bar, oǵan quqyq berildi. Endi ózimizden bastaýymyz kerek. Qazaqstannyń ulttyq qundylyǵy men ulttyq mádenıetin saqtap damytýǵa árbir azamat atsalysýy tıis. Ulttyq mádenıet degenimiz ne? Ol - siz ben bizdiń kúndelikti tirshiligimiz», - deıdi ol.

Ǵalym: «Eýropa mádenıetine bet burǵan qazirgi úderis túbirimen durys emes», degen pikirin bildire otyryp, tól mádenıetimiz tereńge sińgen jaǵdaıda ǵana, zaman kóshinen qalyp qoımaý áreketteri quptalatyndyǵyn atap ótti.

Q.Sartqojaulynyń paıymdaýynsha, mádenıettiń bastaý bulaǵy - tilde. «Biz áýeli tildi ońdaıyq. Qazir bizdiń bet-beınemiz ǵana qazaq, al onyń túbinde qazaqı rýh joq», - deıdi ol.

«Elbasy N.Nazarbaevtyń salıqaly saıasatynyń arqasynda táýelsizdik jyldary ishinde bul túıitkildiń túıini tarqalyp jaǵdaı túzelip keledi. Qazirgi qazaq 1998 jyldardaǵy qazaqqa múldem uqsamaıdy. Sondyqtan, árkimge jaltaqtaýmen ómir súrgendi qoıyp, iship-jegenimizge deıin ózimizdiń mádenıetimizdi qalyptastyrǵan jón. Al ata-babalardan qalǵan asyl muralardy sol mádenıetti qalyptastyrýǵa negiz etip alý qajet», - dedi ǵalym.