Astanada qazaqtyń sándik-qoldanbaly óneri buıymdarynyń kórmesi ótedi
ASTANA. QazAqparat - 4 aqpanda QR Tuńǵysh Prezıdenti murajaıynda shyǵarmashyl jastardyń XV respýblıkalyq «Jiger» festıvali syılyǵynyń ıegeri, Qazaqstan isker áıelder qaýymdastyǵynyń ulttyq «Ajar» syılyǵynyń ıegeri, Qazaqstan Sýretshiler odaǵynyń múshesi Aıjan Ábdýbaıttyń «Ǵasyrlardyń altyn órnegi» atty jeke kórmesi ashylady.
Kórme mýzeıdiń seriktestik jobasy aıasynda qazaqtyń sándik-qoldanbaly óneriniń kóne dástúrleri men tarıhı artefaktilerge jańa ómir bergen avtordyń shyǵarmashylyǵyn jan-jaqty kórsetý maqsatynda uıymdastyrylyp otyr, dep habarlaıdy elorda ákimdiginiń baspasóz qyzmetinen. Aıjan Ábdýbaıttyń shyǵarmashylyǵy aıryqsha. Ol kóne dáýirlerdegi kıimder men turmys quraldaryn qalpyna keltirip, qaıta jańǵyrtýmen aınalysady, kóne «zerleý» tehnıkasyn paıdalanyp, toı jáne ulttyq kıimderdi, turmys zattaryn jasaıdy. Avtordyń aıtýynsha, kestelep toqýdyń tamyry tereńde jatyr. Qazaqtar bul kórkem ádispen bedeldi adamdardyń saltanatty kıimderin, bas kıimderin, turmystyq zattaryn áshekeılegen. Qazaqtyń turmysy men dástúrli kıim-keshekterin etnografııalyq jáne tarıhı turǵyda zertteý qolóner sheberine tarıhı artefaktilerdiń tutas bir bóligin qalpyna keltirýge múmkindik berdi. Olardyń qataryndaǵy han kıimderiniń jınaǵy, Jángir hannyń áskerı mýndıri, Fatıma hanshaıymnyń beshpenti jáne qazaq aqsúıekteriniń qaıta jańǵyrtylǵan kúndelikti qoldanǵan zattary joǵary deńgeıdegi kórkemdik oryndalý sheberligimen qatar ǵylymı mańyzǵa ıe. A.Ábdýbaıttyń qolynan shyqqan týyndylar QR Memlekettik Ortalyq mýzeıiniń, QR Tuńǵysh Prezıdenti mýzeıiniń, Qazaqstannyń oblystyq murajaılarynyń jınaqtarynda saqtalǵan.
