Astanada «Qazaqtyń dástúrli 1000 áni» antologııasynyń tusaýy kesildi
STANA. Qazannyń 2-si. QazAqparat /Gúlmıra Álıakparova/ - Keshe, keshqurym Astanadaǵy «Qazaqstan» Ortalyq kontsert zalynda halqymyzdyń tuńǵysh ulttyq antologııasy «Qazaqtyń dástúrli 1000 áni» jobasynyń tusaýy kesildi. Kesh barysynda elimizdiń kúmis kómeı ánshilerdiń oryndaýynda jobaǵa engen ánder men jyrlar shyrqaldy.
«Qazaqtyń 1000 áni» biregeı antologııasy Elbasynyń «Mádenı mura» ulttyq strategııalyq jobasy aıasynda dúnıege keldi. Oǵan qazaqtyń barlyq óńirlerinde (Arqa, Batys Qazaqstan, Mańǵystaý, Jetisý, Syr, Shyǵys) aıtylatyn sondaı-aq, sheteldegi qazaqtar (Qytaı, Mońǵolııa, Reseı, Ózbekstan) arasynda saqtalǵan halyq ánderi men halyq ánshi-kompozıtorlarynyń týyndylary túgelge jýyq endi. El ishinen jazylyp alynǵan ǵuryptyq ánder men qara óleń úlgileri de jurtshylyq nazaryna iriktelip usynyldy. Qazaqtyń asyl mura, án qazynasyn barynsha mol qamtyǵan bul turpattaǵy asa kólemdi antologııa tuńǵysh ret shyǵarylyp otyr. Eske salaıyq, antologııanyń «Qazaqtyń dástúrli 1000 kúıi» atty birinshi tomynyń tusaýkeseri 2010 jyldyń kókteminde QR Prezıdenttik Mádenıet ortalyǵynda ótken bolatyn.
Keshti ashqan QR Mádenıet mınıstri Muhtar Qul-Muhammed, ótken ǵasyrdyń basynda 1925 jyly professor Aleksandr Zataevıch búkil qazaqtyń dalasyn sharlap, ánimizdiń injý-marjandaryn jınap «Qazaqtyń 1000 áni» atty kitap shyǵarǵanyn jáne kitapta «1000 án» dep atalǵany bolmasa, qazaqtyń ánderi de kúıleri de bolǵanyn atap ótti. Sonyń ishinde 46 ánniń mátini berildi.
Án-jobasy dúnıege kelgen kezde orystyń uly kompozıtory S.Aksakov aıtqan eken: «Mundaı mádenı mura týdyrǵan halyq shyn máninde baqytty halyq», dep. Ekinshi bir orystyń jazýshysy M.Gorkıı «1000 án» jobasyn qarap shyǵyp: «Bul bolashaq Bethovender, Motsarttar, Shopender, Mýsorgskııler úshin baǵa jetpes qazyna ǵoı», dep baǵalaǵan. Shyndyǵynda solaı bolyp shyqty. Brýsılovskııdiń tórt birdeı operasy - «Qyz Jibek», «Ertarǵyn», «Jalbyr» men «Dýdaraıy» «Qazaqtyń 1000 áni» jınaǵynan alynǵan ánderden turady. Tek qana «Qyz Jibek» operasynda 30-ǵa jýyq qazaqtyń ánderi men kúıleri paıdalanǵan», dedi mınıstr.
Kontsertte qazaq óneriniń maıtalman sheberleri KSRO halyq ártisi Bıbigúl Tólegenova, QR halyq ártisteri Nurjamal Úsenbaeva, Nurǵalı Núsipjanov, QR eńbek sińirgen ártisteri Maıra Muhamedqyzy, Kenjeǵalı Myrjyqbaev, Bekbolat Tileýhan óner kórsetti. Sondaı-aq, Aqan men Birjannyń, Muhıt pen Ǵarıfollanyń, Kenenniń dástúrin jalǵastyrýshylar - Erjan Qosbarmaqov, Qaraqat Ábildına, Aıgúl Qosanova, Berik Omarov, Baǵlan Bábijan, Qaırat Baıbosynov, Erbol Aıtbaev, Gúlmıra Sarına jáne taǵy basqalar án men jyrdan shashý shashty.
Kesh halqymyzdy rýhyn jigerlendiretin, elimizdiń eńsesin asqaqtatatyn, Elbasy Nursultan Nazarbaev pen Bekbolat Tileýhannyń uranǵa aınalǵan «Elim meniń» ánimen aıaqtaldy.
