Astanada Qazaqstannyń janýarlar álemi týraly fotokórme uıymdastyryldy (FOTO)
ASTANA. QazAqparat - Ulttyq mýzeıde «Durys ańshylyqty qoldaý jáne janýarlar dúnıesin qorǵaý» korporatıvti Qorynyń Qazaq handyǵynyń 550 jyldyǵyna arnaǵan «Qazaqstannyń janýarlar dúnıesi» atty fotokórme ashyldy.
Uıymdastyrýshylar Qazaqstannyń óńir-óńirinen jiberilgen 231 sýrettiń arasynan 40 jumysty iriktep alyp, kórmege qoıyp otyr eken. Kórmeniń jeńimpazdary 20 qazanda anyqtalady.
«Búgingi kórme - elimizdiń syry kóp tylsym tabıǵatynyń az ǵana bóligin qamtyp otyrǵan shara. Elimizde qustardyń 490 túri, sútqorektilerdiń 172 túri, balyqtyń 100-den astam túri, baýyrymen jorǵalaýshylardyń 51, qosmekendilerdiń 12 túri bar. Jerimizdegi qosmekendilerdiń 3 túri, balyqtardyń 18 túri, jorǵalaýshylardyń 10 túri, qustardyń 57 túri, sútqorektilerdiń 40 túri, ózge de janýarlardyń 128 túri 2010 jyly shyqqan «Qyzyl kitaptyń» 4 basylymyna engen. Bizdiń, qazaqstandyqtardyń mindeti osy janýarlar álemin qamqorlyqqa alý, jan-janýarlardy jónsiz aýlamaı, ańshylyqtyń ádebin saqtaý. Kúsh biriktirsek qana, osy tabıǵat pen ony meken etken neshe túrli janýarlardy saqtap, sanyn kóbeıte alamyz», - dedi kórmeniń ashylýynda «Durys ańshylyqty qoldaý jáne janýarlar dúnıesin qorǵaý» korporatıvti Qorynyń dırektory Oralbaı Ábdikárimov.
Fotokórmeni tamashalaǵandardyń arasynda QR Ulttyq mýzeıiniń dırektory Darhan Myńbaı, Senat depýtaty Vladımır Redkokashın, Májilis depýtaty Qýanysh Sultanov jáne ózge de belgili azamattar bar. Kórme jeńimpazdary 20 qazan kúni, osy Ulttyq mýzeıde marapattalady.
