Astanada Qazaqstannyń tanymal sportshylary jas jankúıerlerimen júzdesti
ASTANA. 7 qazan. QazAqparat /Gúlmıra Alıakparova/ - Búgin Astanadaǵy «Atameken» Qazaqstan kartasy» Etno-memorıaldy kesheninde eldiń tanymal sportshylarynyń balalarmen jáne jasóspirimdermen kezdesýi ótti.
Óskeleń urpaqpen júzdesýge qazaq kúresinen halyqaralyq deńgeıdegi sport sheberi, Álem chempıony, eki dúrkin Azııa chempıony Erlan Estek; qazaq kúresinen eńbegi sińgen sport sheberi, sambodan sport sheberi, dzıýdodan sport sheberi, Álem jáne Azııa chempıony Ǵanı Seıdildaev; qazaq kúresinen sport sheberi, Qazaqstan men Azııa chempıony Darhan Bıjanov; qazaq kúresinen sport sheberi, Qazaqstan chempıonatynyń birneshe márte júldegeri Janaı Ybraev; «Barys» HK-nyń oıynshylary Maksım Hýdıakov, Alekseı Ishmametev; bokstan sport sheberi, bokstan Qazaqstan men Azııa chempıony Іlııas Súleımenov keldi.
Jastardyń sportshylarǵa qoıǵan suraǵy ár-alýan boldy. Máselen olardy, sportshylardyń alǵashqy jeke-jegi qalaı aıaqtalǵandyǵy, alǵashqy jeńilisten keıingi sezimderi, óz jeńisterin qalaı atap ótetindigi, qazaqstandyq sporttyń deńgeıin kóterýge qatysty pikirleri, balalaryn sportqa baýlý máseleleri qyzyqtyrdy.
Jas ta bolsa, birsypyra belesti baǵyndyryp úlgergen, álem deńgeıinde Qazaqstan namysyn jyrtyp júrgen boksshy І.Súleımenovtyń aıtýynsha, búgingi kúni Qazaqstanda sportqa, sonyń ishinde olımpıadalyq oıyndarǵa engen túrlerine úlken qoldaý kórsetilip otyr. Jastarǵa sportpen shuǵyldaný úshin barlyq jaǵdaı jasalǵan. Tabandylyǵy pen patrıottyq sezimi bar ár adam Týǵan eldiń kók baıraǵyn bıikten jelbiretip, ánurandy oınata alady.
«Boks naǵyz erlerdiń sporty. Ol jeńil emes, aýyrǵanyna qaramastan tózimdilik tanytýyń kerek. Tájirıbe, tehnıka jáne ataq ýaqyt óte keledi», - deıdi boksshy.
Al qazaq kúresinen sport sheberi, dzıýdoshyn, samboshy Ǵ.Seıdildaevtyń pikirinshe, otandyq sportty kóterý úshin sporttyq sektsııalardy kóptep ashý kerek.
Kezdesý sońynda sportshylar sportqa qadam jasaı bastaǵan jastarǵa jeńilisterge qaramastan, ójettilik tanytyp, eńseni túsirmeý keńesterin berdi.
Mundaı is-sharalardy ótkizý Qazaqstan sport odaǵynyń dástúrine aınaldy. Eske salsaq, ótken jyly osy syndy kezdesýler Qaraǵandy, Shymkent, Taraz, Aqtóbe, Aqtaý, Oral, Qyzylorda qalalarynda ótti. Jankúıerlerimen Baqtııar Artaev, Maksım Rakov, Dmıtrıı Karpov, Ashat Shaharov, Erjan Kerimov, Erik Áljanov, Aslan Esenov, Nurbolat Ustybaev, Venera Turǵanova jáne taǵy basqa da otandyq sportshylar kezdesken bolatyn.
Elbasynyń «Bolashaqtyń irgesin birge qalaımyz!» atty Joldaýyn nasıhattaý, buqarany sportqa etene tartý maqsatyn tutqan kezdesýdi QR Mádenıet mınıstrliginiń qoldaýymen «Qazaqstan sport odaǵy» ZTB uıymdastyrdy.
