Astanada Qazaqstannyń sán aptalyǵy bastaldy (FOTO)
ASTANA. QazAqparat - Astanadaǵy Pekın-Palas qonaq úıinde qazaqstandyq pret-a-porte sán aptasy bastaldy. Eki kún ishinde Astana turǵyndary men qonaqtary Aida KaumeNOVA, Ainur Turisbek, Alex Chzhen, Aya Bapani, Kamila Kurbani, LaRiya jáne Tamara Lamanukaeva syndy dızaınerlerdiń qolynan shyqqan kıim úlgilerin tamashalaı alady.
«Biz, Astanaǵa kelgenimizge óte qýanyshtymyz. Men buny Qazaqstan sán aptalyǵyn (Kazakhstan Fashion Week) uıymdastyrýyshylardyń atynan aıtyp turmyn. Biz úshin bul óte mańyzdy shara, sondyqtan barlyq dızaınerlerdiń eńbekteri sizderdiń taraptaryńyzdan tıisinshe baǵalanady dep úmittenemiz»,- dedi Kazakhstan Fashion Week-tiń pıar-dırektory Botagóz Aldońǵarova sharanyń saltanatty ashylýyna oraılastyrylǵan brıfıng barysynda.
Onyń aıtýynsha, Kazakhstan Fashion Week qurylǵan 10 jyl ishinde birqatar jetisikterge jetti.
«Osy jyldar aralyǵynda biz shynymen de halyqqa qajetti jobaǵa aınaldyq dep aıtýǵa bolady. Óıtkeni, sán álemi tek dızaınerlerdiń ǵana emes, jalpy halyqtyń da álemge degen kózqarasyn ózgertip, elimizde mádenıettiń qalaı damyp jatqanyn pash etedi», - dedi B. Aldońǵarova.
Aıta keteıik, Kazakhstan Fashion Week bul sharany Qazaqstannyń onkologtary men radıologtary qoǵamymen jáne dúnıejúzindegi kóshbasshy farmatsevtıkalyq kompanııalardyń biri Sanofi-men birlese otyryp, álem áıelderi kóp shaldyǵatyn omyraý obyryna qarsy halyqaralyq qozǵalysqa arnap otyr.
