Astanada Qazaqstannyń halyq sýretshisi Áýbákir Ysmaıylovtyń 100 jyldyǵyna arnalǵan halyqaralyq konferentsııa ótedi
ASTANA. 2 qyrkúıek. QazAqparat - 3-4 qyrkúıek kúnderi Astanadaǵy Táýelsizdik saraıynda Qazaqstannyń halyq sýretshisi Áýbákir Ysmaıylovtyń 100 jyldyǵyna arnalǵan halyqaralyq konferentsııa ótedi, dep habarlady «Qazaqstan halqynyń rýhanı damý qory» AQ baspasóz qyzmeti.
Bul sharany Qazaqstan Respýblıkasy Mádenıet jáne aqparat mınıstrliginiń Mádenıet komıteti, Astana qalasynyń ákimdigi, sýretshiniń januıasy jáne «Qazaqstan halqynyń rýhanı damý qory» AQ uıymdastyryp otyr. .
Áýbákir Ysmaıylov - beıneleý ónerindegi shyǵarmashylyǵy ejelgi kóshpelilerdiń mıfologııalyq shyndyǵyn jarqyn qubylysqa aınaldyrǵan renessanstyq sýretshiniń biregeıi. Sarapshylar sýretshiniń shyǵarmashylyq jolyn zertteý men zerdeleýlerinde onyń shyǵarmashylyǵy jańa ǵasyrymyzda kóshpeliler jáne túrki áleminiń qaıta órleý dáýiriniń baıtaq jylnamasyna jańa paraqtardyń qosylýyna jol ashty dep baǵalaıdy.
Á Ysmaıylovtyń shyǵarmashylyq joly Qazaqstandaǵy beıneleý óneriniń qalyptasýymen týra keledi. 1928 jyly Á. Ysmaıylov tuńǵysh uıymdastyrylǵan qazaqstandyq jyljymaly sýret kórmesine qatysty.
Ol Ombydaǵy M. Vrýbel atyndaǵy qórkemsýret-óndiristik tehnıkýmynda oqıdy. 1929 jyldan Á. Ysmaıylov joǵary kórkem sýret tehnıkalyq ınstıtýtynda oqıdy. 1930 jyly ol Máskeý polıgrafııalyq ınstıtýtynyń grafıka fakýltetinde oqyp bilim alady. 1931 jyldan «Oktıabr» atty sýretshiler birlestiginiń quramyna qabyldandy. 1932 jyly KSRO Sýretshiler Odaǵynyń múshesi bolǵan Á. Ysmaıylovqa ulttyq sýretshiler odaǵyn ashý mindettelip Qazaqstanǵa keledi. Ol 1933 jyldan jańa qurylǵan Qazaqstan Sýretshiler Odaǵynyń alǵashqy uıymdastyrý komıtetiniń tóraǵasy bolyp, bul mindetti 1940 jylǵa deıin abyroımen atqarady. 1935 jyly Á. Ysmaıylov Máskeýde kásibı sýretshiler birlestiginiń quramyna enedi. Sonymen qatar, 1932-1934 jyldar aralyǵynda Á. Ysmaıylov GITIS-te uly Stanıslavskııdiń assıstenti I.I. Sýdakovtyń sheberhanasynda ónerin shyńdaıdy. Kásibı teatr rejısseri mamandyǵyn ıgergen Á. Ysmaıylov Qazaqstanǵa kele áriptesi J. Shanınmen birlesip, Qazaq drama teatryn uıymdastyrýǵa at salysyp, onda 1938-1943 jyldar aralyǵynda qyzmet atqarady. 1936 jyly Máskeýde ótken tuńǵysh Qazaq mádenıeti men óneriniń onkúndigine qatysady. Áýkeńniń qazaq bılerin jınaqtaǵan kóp jyldyq eńbegi 1961 jyly baletmeıster D. Ábirovpen birge qazaq bıleriniń entsıklopedııasyn shyǵarýǵa sebep bolady. Á. Ysmaıylov kınematografııa salasynda da ózin jan-jaqty akter retinde kórsete bildi, ol «Kútý», «Kógildir marshrýt», «Sol kúnderde», «Taqııaly perishte», «Qyz Jibek» fılmderine tústi.
Áýbákir Ysmaıylovtyń kórkemdik murasy qazaq beıneleý óneriniń «altyn qorynyń» tórinen tıisti ornyn aldy. Uly sheberdiń kórkemsýret jáne grafıkalyq shyǵarmalary óziniń sheberligimen, sıýjet pen taqyryp jan-jaqtylyǵymen, kolorıttik baılyǵymen jáne somdaǵan obrazdarynyń fılosofııalyq tereńdigimen tańǵaldyrady.
Áýbákir Ysmaıylovtyń 100 jyldyǵyna arnalǵan Halyqaralyq konferentsııa gýmanıtarlyq baǵyttaǵy bir ıdeıaǵa toǵysqan ár túrli kásibı mamandardyń basyn qosyp, Qazaqstandyq ulttyq ónerdiń ózindik ereksheligin sezinip ony álemdik óner mektepterimen jan jaqty baılanystyrý bolyp tabylady. Konferentsııadaǵy qozǵalatyn basty problema Áýbákir Ysmaıylovtaı birtýar tulǵanyń fenomeni bolmaq. Qylqalam sheberi ulttyq mádenıet pen salt-dástúrlerdiń shynaıy taratýshysy bola bildi. Onyń boıynda ulttyq qundylyqtardy, týǵan eliniń sulýlyǵyn álemge qaıtalanbas pezajdary arqyly jetkizsem, folklorlyq dástúrin jáne tarıhı keıipkerler beınesin aınytpaı somdasam degen óshpes jiger bolatyn.
Áýbákir Ysmaıylov osyndaı halyqshyldyǵymen kórermenderi men óner súıer qaýymnyń júreginen oryn alǵan qaıtalanbas dara daryn, birtýar tulǵa bolyp máńgi jasaı bermek.
Konferentsııa aıasynda baspasóz máslıhaty ótedi jáne sýretshiniń kórmesi ashylady.
