Astanada Qazaqstannyń Halyq sýretshisi Áýbákir Ysmaıylov atyndaǵy kóshe ashyldy
ASTANA. 28 qyrkúıek. QazAqparat - Búgin Astanada Qazaqstannyń halyq sýretshisi Áýbákir Ysmaıylov atyndaǵy kósheniń ashylý saltanaty ótti.
Áýbákir Ysmaıylov atyndaǵy kóshe Respýblıka dańǵyly men Baraev kóshesiniń aralyǵynda jatyr.
«Áýbákir atamyzdyń qazaq óneri men mádenıetine qosqan úlesi árqashan da halyq esinde qalady. Qarapaıym aýyl balasy tabıǵat bergen talanty men eńbekqorlyǵy arqasynda qazaq ónerin álemge tanytqan óner tarlany bolyp ósti. Elordamyzdyń tórinen qazaq beıneleý óneriniń irgetasyn qalaýshylardyń biri, Qazaqstannyń halyq sýretshisi Áýbákir Ysmaıylovtyń esimimen kóshe ataýynyń berilýi - sýretshiniń óneri men qoǵamdaǵy eńbegin joǵary baǵalaý bolyp tabylady», - deıdi Sýretshiler odaǵynyń Astana qalasyndaǵy fılıalynyń tóraǵasy Qońyr Muhamedıev.
Dál osy kúni «Nazarbaev ortalyǵy» MM-inde keler jyly 100 jyldyǵy atalyp ótetin sýretshi jumystarynyń kórmesi ashylady.
Kórmede Astana qalasy qazirgi zamanǵy óner murajaıy men Qaraǵandy murajaıynyń qoryndaǵy jáne Ysmaıylovtar áýletiniń kollektsııasyndaǵy kartınalar qoıylady. Buryn esh jerde kórmege qoıylmaǵan sýretshiniń shaǵyn akvareldi portretin de osy kórme kezinde tamashalaýǵa bolady.
