Astanada Qazaqstannyń halyq sýretshisi Á. Ysmaıylovtyń 100 jyldyǵyna oraı «Álem kóshpendi boıaýynda» atty kórme ashylady
ASTANA. 3 qyrkúıek. QazAqparat - Erteń Astanada Táýelsizdik saraıynda Qazaqstannyń halyq sýretshisi Áýbákir Ysmaıylovtyń týǵanyna 100 jyl tolýyna arnalǵan «Álem kóshpendi boıaýynda» atty kórme ashylmaq. Bul týraly búgin sýretshiniń 100 jyldyǵyna arnalǵan sharalardyń bastalýyna arnalǵan baspasóz máslıhatynda Táýelsizdik saraıy galereıasynyń basshysy, ónertanýshy, fılologııa ǵylymdarynyń doktory Tileýkesh Jaýbasova málim etti.
"QR Mádenıet jáne aqparat mınıstrliginiń qoldaýymen biz Táýelsizdik saraıynda qazaqstyń tanymal sýretshisi, kúıshi, bıshi, akter, halyq folklorynyń jınaýshysy Áýbákir Ysmaıylovtyń týǵanyna 100 jyl tolýyna oraı birqatar mádenı sharalardy qolǵa almaqpyz. Kórmede kórermen nazaryna qylqalam sheberiniń 1930-1990 jyldary dúnıege ákelgen 100-ge jýyq keskindemelik jáne grafıkalyq týyndylary usynylady", - dedi ol.
Á. Ysmaıylov kópqyrly adam boldy. Ol bizge tek sýretshi retinde ǵana emes, sonymen birge halyq bıiniń mamany boldy. Óz kezinde ol Almatynyń "Sazgen" ansambliniń qoıylymdaryn jasaǵan. Sondaı-aq ol - dombyrashy bolǵan kisi. Ol qazaqtyń ulttyq mádenı jáne rýhanı qundylyqtaryn saqtaýǵa úlken eńbek sińirdi", - dep atap ótti T. Jaýbasova.
Áýbákir Ysmaıylov - QR mádenıet qaıratkeri, ár jyldary Eńbek Qyzyl Tý, Qurmet belgisi ordenderimen marapattalǵan, Qazaq KSR Eńbek sińirgen óner qaıratkeri, Qazaq KSR Halyq sýretshisi ataǵyn ıelengen. Onyń baı murasy búgingi tańda qazaq beıneleý óneriniń altyn qorynan laıyqty ornyn alyp otyr. Has sheberdiń keskindemelik jáne grafıkalyq týyndylary óziniń oryndalý sheberligimen, taqyryby men sıýjetiniń sheksiz alýandyǵymen, boıaýynyń baılyǵymen jáne obrazdarynyń fılosofııalyq kóterińkiligimen tańǵaldyrady.
"Erteń, Qazaqstannyń halyq sýretshisi Áýbákir Ysmaıylovtyń týǵanyna 100 jyl tolýyna oraı, QR Mádenıet jáne aqparat mınıstrligi úsh tilde (qazaq, orys, aǵylshyn) «Álem kóshpendi boıaýynda» atty kitap-albomyn jarııalaıtyn bolady. Sonymen qatar mınıstrlik sýretshiniń týǵan-týystarynyń estelikteri negizinde derekti fılm túsirýdi qolǵa alýda. Oǵan reseılik mamandar da tartylatyn bolady. Atalmysh fılmdi biz bıylǵy jyldyń sońynda kórip qalýymyz yqtımal. 30 mınýttyq kartınada Á.Ysmaıylovtyń taǵdyry jáne onyń shyǵarmashylyq joly áriptesteriniń, mádenıet salasyndaǵy sarapshylardyń kózqarasymen beriletin bolady", - deıdi QR Mádenıet jáne aqparat mınıstrligi Aqparat jáne muraǵat komıtetiniń tóraǵasy Bolat Kalıanbekov.
