Astanada Qazaqstannyń halyq ártisi, bıshi Gúljan Talpaqovanyń shyǵarmashylyq keshi ótti
ASTANA. QazAqparat - Búgin QR Ulttyq akademııalyq kitaphanasynda Qazaqstannyń halyq ártisi, bıshi Gúljan Talpaqovanyń "Gúljan - ǵumyr, gúl - ǵumyr" atty shyǵarmashylyq keshi jáne óner ıesiniń qyzy, "Aıoko Bo" sán úıiniń jetekshisi, tiginshi-dızaıner Aıjan Boqaeva men jastardyń kezdesý keshi ótti.
"Qazaqstanda 21 jasynda mádenıet qaıratkeri ataǵyn, al 31 jasynda Halyq ártisi ataǵyn alǵan óner ıeleri óte az. Sodardyń biri ári biregeıi osy Gúljan Talpaqova", - dep atap ótti quttyqtaý sózinde kesh qonaǵy, QR Parlamenti Májilisiniń depýtaty Zeınolla Alshymbaev.
Aıta keteıik, G. Talpaqova Almaty estrada-tsırk óneri stýdııasyn Sh. Jıenqulovanyń halyq bıi klasy boıynsha bitirgen. Ol álemniń 52 eliniń kıeli sahnasynda "Qýyrshaq bıi", "Almas qyrǵaýyl", "Álııa", "Aıdan qyz", "Qos alqa" syndy qazaq bılerin bılep, ózbektiń "Horezm bıi" men birqatar Azııa halyqtarynyń bılerin óner aıdynyna alyp shyǵyp, bı óneriniń birtalaı asýlaryn baǵyndyrǵan.
Kesh barysynda bıshi óz ómiri týraly syr shertti.
"Men kádimgi qarapaıym qazaqtyń qyzymyn. Bı óneriniń arqasynda álemdi sharlap, kóptegen qyzyq pen qıyndyqty da kórdim. Óner men birge otbasyn da birge alyp júrdim, bı meniń ómirime aınaldy", - deıdi Halyq ártisi.
Sondaı-aq ol jastarǵa óner jolyna túskileri kelse, bul salany jan-tánderimen súıýi kerek ekenin qadap aıtty.
Aıta keteıik, sharaǵa QR Parlamenti Májilisiniń depýtaty Zeınolla Alshymbaev, QR Eńbegi sińgen óner qaıratkeri Tursynbek Nurǵalıev, "Astana Ballet" memlekettik teatrynyń atqarýshy dırektory Valerıı Kúzembaev, "Shalqyma" halyq bı ansambliniń kórkemdik jetekshisi Ábdirasyl Esekeev jáne Qazaqstannyń eńbek sińirgen ártisi, Horeograftar odaǵynyń múshesi, baletmeıster Toıǵan Ospanqyzy qatysty.
