Astanada Qazaqstannyń eńbek sińirgen sáýletshisi Qaldybaı Montaqaevtyń kórmesi ashyldy
ASTANA. 2 naýryz. QazAqparat - Elordadaǵy Táýelsizdik saraıynda KSRO halyq sáýletshisi, KSRO Memlekettik syılyǵynyń laýreaty, Qazaqstannyń eńbek sińirgen sáýletshisi, «Qurmet» ordeniniń ıegeri, Halyqaralyq sáýlet akademııasynyń akademıgi Qaldybaı Montaqaevty eske alýǵa arnalǵan «Sáýlet salasynyń sańlaǵy» atty kórme ashyldy,
dep habarlaıdy Astana qalasynyń resmı saıty uıymdastyrýshylarǵa silteme jasap.
Qazaqstan sáýletiniń tarıhynda Qaldybaı Montaqaevtyń orny aıyryqsha. Almaty joǵary sáýlet mektebiniń túlegi elimizdiń astanasy úshin kóptegen turǵyn úı-azamattyq qurylys jobalaryn ázirlep, óziniń sáýlet ónerine degen talantyn erte tanytty. Atap aıtqanda: 1176 oryndyq jalpy bilim beretin mektep, ıadrolyq suıyqtyqtaǵy 12 qabatty turǵyn úı, Almatydaǵy Prezıdent Rezıdentsııasy (qazirgi QR Tuńǵysh Prezıdentiniń muraǵaty), Almaty oblystyq partııa komıtetiniń ǵımaraty, taǵy basqa da nysandar. Qaldybaı Jumaǵalıuly eńbek jolyn «Almatygıprogor» mekemesinde sáýletshilikten bastap ınstıtýttyń bas sáýletshisi laýazymyna deıin ósti. Almatydaǵy Respýblıka alańyn jobalap, salý Qaldybaı Montaqaev shyǵarmashylyǵyndaǵy eń negizgi kezeń boldy.
Qaldybaı Jumaǵalıuly jańa Astananyń da sáýlettik qalyptasýyna atsalysty.1996 jyly onyń basshylyǵymen bir top sáýletshiler Astanany damytýdyń bas josparyn ázirleý baıqaýynda jeńip shyqty. Ol QR Prezıdentiniń Rezıdentsııasynyń (qazirgi QR Tuńǵysh Prezıdenti murajaıy), QR UQK, Samal shaǵyn aýdany, Úkimet pen Parlament ǵımarattaryn qaıta jańǵyrtý, Syrtqy ister mınıstrligi, Kongress-holl, Esil ózeni jaǵalaýyn jańartýdyń avtory.
Kórmege sáýletshiniń nagradalary, planshetteri men grafıkalyq jáne akvareldik jumystary qoıylatyn bolady.
