Astanada Qazaqstannyń eńbek sińirgen ártisi Shahmardan Ábilovtiń kameralyq-vokaldyq kontserti ótti
ASTANA. 25 qazan. QazAqparat /Jasulan Amanbaıuly/ - Astanadaǵy Pavlodar oblysynyń mádenıet kúnderi aıasynda búgin elordadaǵy QR Prezıdenttik mádenıet ortalyǵynyń kontsert zalynda Qazaqstannyń eńbek sińirgen ártisi, Memlekettik syılyqtyń ıegeri Shahmardan Ábilovtiń shyǵarmashylyq keshi ótti.
Sh. Ábilovtiń esimi elimizge ǵana emes, alys-jaqyn shet elderge de áıgili. Ónerdegi ózindik ereksheligimen, qaıtalanbas shyǵarmashylyq bet-beınesimen tyńdaýshynyń júregin jaýlap alǵan Shahmardan Ábilov elimizdegi mýzyka mádenıetinde erekshe oryn alady.
Ánshiniń shyǵarmashylyq repertýarynda qazaqstandyq kompozıtorlar E. Rahmadıev, T. Muhamedjanov, M. Saǵatov, B. Amanjolovtardyń Abaı óleńderine jazylǵan vokaldyq shyǵarmalary basty oryndy ıelenedi. Kontsert kezinde astanalyqtar ánshiniń oryndaýyndaǵy A. Jubanov pen L. Hamıdıdiń «Abaı» operasyndaǵy - Abaı, E. Rahmadıevtiń «Abylaı hanynda» - Buhar jyraý, E. Brýsılovskııdiń «Er Tarǵynynda» - Er Tarǵyn, sondaı-aq kameralyq-vokaldyq klassıkanyń álemdik úlgileri - Dj. Verdıde - Rıgoletto, Amonasro, Jermon, Graf dı Lýna, N. Rımskıı-Korsakovtyń «Patsha qalyńdyǵy» shyǵarmasynda - Grıaznoı partııalaryn tyńdaý múmkindigine ıe boldy.
Onyń halyqqa barynsha tanymal etken kontserti Londondaǵy Barbıkan-hollda koroldik kameralyq orkestrmen bergen kontserti boldy. Bul jaıly Bı-bı-sı tilshisi: «London Sıtı ortalyǵynda XI ǵasyrdaǵy shirkeýde kontsert berip, tek qana álemdik tanymal juldyzdardyń kelgenine daǵdylanǵan qaladan osynsha kóp tyńdarman jınaý, bul teńdesi joq qubylys boldy», dep jazsa, BUU-nyń «Beıbitshilik isi úshin» syılyǵynyń ıegeri, belgili ánshi Osman Tıýrkaı: «Bul Qazaqstandaǵy balamasy joq ulttyq qundylyq», dep baǵalady.
Sh. Ábilov óneriniń jarqyn tustary Parıjdiń Pleıel zalynda, Vınchenso, Berlın, Tel-Avıv, Máskeýdegi Reseı Kompozıtorlar odaǵy jáne P.I. Chaıkovskıı atyndaǵy konservatorııanyń kishi zalynda ótti. Gastroldik saparmen London, Parıj, Tel-Avıv, Helsınkı, Venetsııa, Vena, Stokgolm, Berlın, Máskeý, Ystambul, Ankara, Ýlan-Ýde, Kıev, Mınsk, Vılnıýs, Tallınn, Tashkent, Bishkek, Ýfa, Baký, Qazan t.b. álemniń áıgili qalalarynda óner kórsetti.
