Astanada Qazaqstannyń eń úzdik sport jýrnalısteri marapattaldy
ASTANA. 2 shilde. QazAqparat - Búgin Halyqaralyq sport jýrnalısteri kúninde QR Sport jáne dene shynyqtyrý isteri agenttigi Qazaqstannyń eń úzdik sport jýrnalısterin marapattady.
15 tilshi qurmet gramotalarymen jáne qazaqstandyq jankúıerlerdiń «Olımpıada-2012» jeıdelerine ıe boldy.
«Sport - qashanda beıbitshiliktiń, halyqtar arasyndaǵy dostastyqtyń beınesi ispettes. Sport - jeke adamnyń ǵana emes, sonymen qatar, tutas bir memleketterdiń basyn biriktirýshi kúsh bolyp qala bermek. Salaýatty ómir saltyn ustanýdy nasıhattap júrgender de - osy tórtinshi bılik ókilderi», - dedi QR Sport jáne dene shynyqtyrý isteri agenttigi tóraǵasynyń orynbasary Elsııar Qanaǵatov.
«Sizderge qıyndyǵy mol qyzmetterińizde úlken tabystar tileımin. Sport jaıynda jáne qazaqstandyq sportshylar jaıynda jazyp júrgenderińizge rızamyn», - dep túıindedi sózin ol.
Halyqaralyq sport jýrnalısteri kúni jyl saıyn 2 shilde kúni toılanady. 1924 jyly dál osy kúni Parıjde bir jarym myń ulttyq odaqtyń basyn biriktirgen, halyqaralyq sport baspasózi qaýymdastyǵy (AIPS) quryldy. QR Mádenıet jáne aqparat mınıstrliginiń málimetterine sáıkes, búginde elimizde 2752 BAQ bolsa, sonyń ishinde sport baspasóziniń sany aıtarlyqtaı artyp keledi.
