Astanada Qazaqstannyń barlyq dybys rejısserleri bas qosady
ASTANA. QazAqparat - 11-16 tamyz aralyǵynda elordadaǵy Beıbitshilik jáne kelisim saraıynda saǵat 10.00-de dybys rejısserleri men jaryq qoıý jónindegi sýretshilerine arnalǵan sheberlik dárisi ótedi. Bul týraly astana.kz jazady.
Trenıngti Astana qalasynyń Mádenıet basqarmasy men AQSh Elshiligi birlese uıymdastyrýda. Іs-sharaǵa kontsert zaldaryndaǵy dybys rejısserleri men jaryq qoıý jónindegi sýretshiler, mádenıet saraılary, teatr, tsırk jáne túrli stýdııalardan keletin shyǵarmashyl tulǵalar qatysady.
Uıymdastyrýshylardyń aıtýynsha, bul óz salasynda pisip-jetilgen, naǵyz maıtalmandardan tájirıbe alýǵa múmkindik beretin biregeı shara. Óz tájirıbesimen bólisýge amerıkalyq sarapshylar men praktıkter daıyn: Djýlı Dobo hanym - «Company E» tehnıkalyq dırektory, Pol Emerson myrza - «Company E» art dırektory.
Semınarǵa astanalyq tsırk, teatr jáne kontsert zaldarynyń qyzmetkerleri de qatysady.
