Astanada Qazaqstannyń sý sharýashylyǵyn damytýǵa arnalǵan halyqaralyq qujattarǵa qol qoıyldy
ASTANA. KAZINFORM –Birikken Ulttar Uıymynyń Damý baǵdarlamasynyń Qazaqstandaǵy turaqty ókili Katarjına Vavernıa memleketter tasqyn sııaqty tabıǵı daǵdarystardy birlesip eńserý kerektigin aıtty.
Qazaqstannyń sý sektoryn damytý jónindegi úılestirý keńesi otyrysynda boıynsha Sý resýrstary jáne ırrıgatsııa mınıstrligi men halyqaralyq seriktes arasynda yntymaqtastyqty damytý jónindegi bes qujatqa qol qoıyldy.
Birinshisi — Ispanııanyń Xcalibur Smart Mapping kompanııasymen Qazaqstannyń batysyndaǵy jerasty sýlarynyń kenishterin kartaǵa túsirý jobasy týraly kelisim.
Ekinshisi — Islam damý banki, BUU damý baǵdarlamasy jáne Sý resýrstary jáne ırrıgatsııa mınıstrligi arasyndaǵy áriptestik nıettestik týraly málimdeme. Qujat Qazaqstannyń sý salasyndaǵy tehnıkalyq áleýetin birlesip nyǵaıtý, salany tsıfrlandyrý, tasqyndy boljaý júıesin jetildirý, klımattyń ózgerýine tózimdilikti arttyrý, sý saıasatyn damytý baǵyttaryn qamtıdy.
Sondaı-aq, úshinshi Sý resýrstarynyń aqparattyq-taldaý ortalyǵy men Eýrazııalyq damý banki arasynda sý resýrstarynyń ulttyq aqparattyq júıesin qurýǵa grant bólý týraly kelisimge qol qoıdy. Joba 2026 jyly aıaqtalady. Maqsaty — Qazaqstannyń sý resýrstaryn basqarýdyń ashyqtyǵy men tıimdiligin arttyrý, shyǵyndardy azaıtý jáne olardyń utymdy bólinýin qamtamasyz etý.
Tórtinshi qujat — «Qazsýshar» kásiporny men qytaılyq Power China International kompanııasynyń arasyndaǵy yntymaqtastyqty odan ári nyǵaıtý týraly kelisim. Bul kelisim Qazaqstannyń sý mamandaryn Qytaıǵa oqytý semınarlaryna jiberýdi kózdeıdi. Mınıstrliktiń málimeti boıynsha, 30 adamnan turatyn birinshi top osy kelisim aıasynda Qytaıda eki aptalyq oqýdy bastap ketken.
Besinshi qujat — «Qazsýshar» jáne «Primus Capital Almaty» JShS arasyndaǵy yntymaqtastyq týraly memorandým. Qujat «Qazsýshar» RMK-nyń gıdrotehnıkalyq qurylystarynyń bazasynda shaǵyn sý elektr stantsııalaryn salýǵa baǵyttalǵan.
Atalǵan jıynda Birikken Ulttar Uıymynyń Damý baǵdarlamasynyń Qazaqstandaǵy turaqty ókili Katarjına Vavernıa Qazaqstan 2024 jylǵy tasqyn kezinde tabıǵı daǵdarysty sheshýge qabiletti ekenin kórsetti degen pikir aıtty.