Astanada qazaqstandyq sýretshi Sultan Ilıaevtiń jeke kórmesiniń vernısajy ótedi
ASTANA. 13 qańtar. QazAqparat - 15 qańtarda Astanada Qazirgi zamanǵy óner murajaıynda Sýretshiler odaǵynyń jáne Qazaqstan dızeınerleri odaǵynyń múshesi, QR eńbegi sińgen qaıratkeri Sultan Ilıaevtiń «Qaıtalaý...» atty jeke kórmesiniń vernısajy ótedi. Bul týraly astana.kz saıtyna murajaıdyń baspasóz qyzmetinen habarlady.
Kórmege 2011-2013 jyldary salynǵan 38 óner týyndysy qoıylady. Atap aıtqanda, «Oazıs», «Aýyl», «Altyn aı», «Arnaý», «Aǵash kóleńkesinde», «Qalyńdyq», «Besik», «Teńizdiń jaǵasynda», «Ushý», «Aınanyń aldynda» syndy 28 ádemi polotno men «Balalyq shaq», «Bala túsi», «Idıllııa», «Ushý», «Oıaný», «Kún men tún», «Áýen», «Kún astyndaǵy úı», «Balyqtar men qustar» sııaqty 10 grafıkalyq sýretter jáne t.b.
«Aıta keteıik, sýretshiniń eńbekteriniń astary bar. Bul - jaýaby birden túsinikti bolatyn qarapaıym formýlalar emes, ishteı qarama-qaıshy kúrdeli ári jaı mán-maǵynalar júıeleri. Ol óziniń eńbekterinde etnomádenı sıpattamalarǵa ıe qazaq sándik-qoldanbaly ónerdiń komponentterin udaıy saqtaıdy»,- dep habarlady murajaıdyń baspasóz qyzmetinen.
Sýretshi shyǵarmalarynyń negizgi tujyrymdamasy - bul ádettegi jaǵdaıdan tys bolý, jańa qalypqa ený bolyp tabylady.
Sultan Ilıaev 1954 jyly sýretshiniń otbasynda dúnıege kelgen. 1977 jyly Shymkent memlekettik pedagogıkalyq ýnıversıtetiniń kórkemsýret-grafıka fakýltetin támamdap, Á.Qasteev atyndaǵy kórkemsýret ýchılışesinde sabaq bergen. 1981 jyly S.Ǵ.Ilıaev KSRO Sýretshiler odaǵyna qabyldandy. 1978-1991 jyldary Shymkent qalasynyń bas sýretshisi bolyp istedi, 1991-1995 jj - Ońtústik Qazaqstan oblysynyń Sýretshiler odaǵynyń tóraǵasy boldy. 1995 jyldan bastap Shymkent qalasynyń bas sýretshisi, qala ákiminiń Dızaın basqarmasynyń bastyǵynyń orynbasary boldy. 1998 jyldan bastap QR Dızaınerler odaǵynyń múshesi. 2004 jyly «QR Mádenıet qaıratkeri» ataǵyn ıelendi. 2013 jyly «QR eńbek sińirgen qaıratkeri» qurmetti ataǵyn alyp, «Oblysqa sińirgen eńbegi úshin» OQO ákiminiń medalimen marapattaldy. Ilıaev Sultan Ǵanıuly 2010 jyldan beri Shymkent qalasy QR Sýretshiler odaǵynyń basqarma tóraǵasy bolyp istep keledi.
S.Ǵ. Ilıaev - respýblıkalyq, búkilodaqtyq jáne halyqaralyq kórmelerge qatysýshy, KSRO SO jáne QR Mádenıet mınıstrliginiń gramotalarymen marapattalǵan. Ilıaevtiń týyndylary Almaty, Máskeý, Tashkent, Sochı qalalaryndaǵy murajaılarda jáne álemniń túrli qalalaryndaǵy jeke galereıalarda saqtaýly.
Eske salaıyq, Sultan Ilıaevtiń «Qaıtalaý...» atty jeke kórmesi murajaıda 15 qańtardan 15 aqpanǵa deıin bir aı boıy ótedi.
