Astanada qazaqstandyq sport brendteriniń biryńǵaı fan-klýby qurylady
ASTANA. QazAqparat - Nazarbaev Ýnıversıteti bazasynda qazaqstandyq sport brendteriniń - velokomandanyń, basketbol jáne fýtbol klýbtarynyń, «Barys» hokkeı sýperklýbynyń, «Astana Motorsport» rallı-reıd komandasynyń, «Astana Arlans» boks komandasynyń jáne sý doby komandasynyń biryńǵaı fan-klýby ashylady.
Bul týraly búgin Nazarbaev Ýnıversıteti men «Astana» Prezıdenttik kásibı sport klýby (PKSK) arasyndaǵy memorandýmǵa qol qoıý barysynda málim etildi.
«Nazarbaev Ýnıversıteti - zııatker mamandar men kóshbasshylardyń ustahanasy bolsa, «Astana» Prezıdenttik kásibı sport klýby elimizdi álemge tanytatyn sport maıtalmandaryn shyńdaıtyn sheberhana ispetti. Bizdiń eki brendti de, ıaǵnı ýnıversıtet pen klýbty Memleket basshysy biriktirip tur. Sondyqtan búgingi qol qoıyp jatqan memorandým salaýatty ómir saltyn nasıhattaýǵa zor úlesin qosady dep senemiz», - dedi «Astana» PKSK bas dırektorynyń mindetin atqarýshy ıÝrıı Melnıchenko.
Nazarbaev Ýnıversıtetiniń vıtse-prezıdenti Qadısha Daıyrovanyń atap ótýinshe, fan-klýb atalǵan joǵary oqý ornynyń stýdentteri men Astanadaǵy basqa da oqý ordalarynyń tálimgerlerin biriktirip, sondaı-aq, «Astana PKSK múshelerin qoldaý qyzmetin úılestiretin bolady.
Taraptar memorandým aıasynda klýbtardyń mıssııasyn, ánurandaryn jasaýda, túrli PR-aktsııalar men flesh-mobtar, konkýrstar uıymdastyrý máselelerinde, sonymen qatar stýdentter men kásibı sportshylar arasynda sporttyq saıystar ótkizýde áriptestik qarym-qatynas ornatýdy josparlap otyr.
