Astanada qazaqstandyq-reseılik sarapshylar forýmy ótti
ASTANA. QazAqparat - Elordada ekinshi qazaqstandyq-reseılik sarapshylar forýmy ótti, dep habarlaıdy QazAqparat tilshisi.
Forým barysynda Qazaqstan men Reseıdiń belgili sarapshylary Eýrazııalyq ıntegratsııany damytýdyń ózekti máselelerin talqylady. Birinshi sessııany mamandar «Jahandyq geosaıası transformatsııa dáýirindegi Eýrazııa» taqyrybyna arnady.
Halyqaralyq qatynastar jónindegi qazaqstandyq keńestiń atqarýshy dırektory Eskendir Aqylbaev ırandyq kelisimnen AQSh-tyń shyǵýy máselesine toqtaldy. Onyń aıtýynsha, atalǵan oqıǵa barsha eýrazııalyq keńistikke áser etetin bolady.
Óz kezeginde «Valdaı» halyqaralyq pikirtalas klýby damý jáne qoldaý qory keńesiniń tóraǵasy Andreı Bystrıtskıı osyndaı dıalog alańynyń qajettigin atap ótti.
«Bul bizdiń ekinshi sarapshylyq dıalogymyz. Bul turǵyda úshinshi osyndaı talqylaýlar bolady degen úmittemin. Osy tektes pikir almasýlar qaıshylyqtardyń aldyn alýǵa yqpal etedi. Jalpy alǵanda, biz syn-qaterler men qaýipterdi eskere otyryp, ońtaıly kózqarastardy ustanyp otyrmyz», - dedi Andreı Bystrıtskıı.
