Astanada qazaqstandyq óner aptalyǵy ótedi
ASTANA. 18 qazan. QazAqparat - Astanada 21-27 qazanda alǵash ret «Táýelsizdik Saraıy» zaldarynda "Kazakhstan Art Week" qazaqstandyq óner aptalyǵy, qazirgi zamanǵy ónerdiń halyqaralyq kórme-baıqaýy ótedi. Bul týraly «Táýelsizdik Saraıy» MKQK baspasóz qyzmetinen habarlady.
Іs-sharaǵa shet elderdiń sýretshileri, fotograftary, halyqtyq qolóner sheberleri qatysady. Elordada 20 eldiń sheberleri bas qosady dep kútilýde.
Aptalyq halyqaralyq baıqaýlar, kórme-jármeńke, kórkem konferentsııa jáne sheberlik synyptary, dárister sekildi baǵyttar boıynsha ótedi.
Uıymdastyrýshylardyń aıtýynsha, baıqaý baǵdarlamasyna qazaqstandyq jáne sheteldik 500-den astam avtor qatysady. Kelýshiler úshin art-nysandardy kórý, baǵalaý, avtorlarmen kelisimder jasaý úshin barlyq jaǵdaı jasalady. Konferentsııa jumysyna qoǵamdyq uıymdardyń ókilderi qatysady. Atap aıtqanda, sýretshiler, dızaınerler, fotograftar odaqtary men qaýymdastyqtary, galereıa, salondardyń jáne dızaın stýdııalardyń dırektorlary, ónertanýshylar, óner men art ındýstrııa máseleleri týraly jazatyn jýrnalıster men jýrnaldardyń bas redaktorlary.
Aıta keteıik, qazaqstandyq óner aptalyǵy baǵdarlamasy úlken bilim berý blogynan turady, sheberlik synyptar, dárister, shyǵarmashylyq kezdesýler uıymdastyrylady, belgili sýretshiler men kórkemsýret sheberleri ózderiniń tájirıbelerimen, bilimimen bólisedi.
Jobanyń maqsaty men mindeti - astanalyq qoǵam men kásibı aýdıtorııany qazaqstandyq, TMD elderiniń jáne alys sheteldik avtorlardyń shyǵarmashylyǵymen tanystyrý, sonymen qatar, múmkindigi shekteýli daryndy sýretshilerge qoldaý kórsetý bolyp tabylady.
