Astanada Qazaqstandyq MedıaAlıanstyń quryltaı sezi bolyp ótti
ASTANA. QazAqparat - Astanada Qazaqstandyq MedıaAlıanstyń quryltaı sezi bolyp ótti, dep habarlaıdy «QazAqparat» HAA tilshisi.
Jınalǵan jurtshylyq aldynda sóz sóılegen uıymdastyrý komıtetiniń múshesi Armanjan Baıtasov Qazaqstandyq MedıaAlıanstyń uıymdastyrý komıteti osy jyldyń maýsymynda qurylǵanyn, 3 qazan kúni atalǵan uıymnyń memlekettik tirkeýge alynǵanyn atap ótti.
«Menińshe, medıa salasyna aýqymdy ári durys uıym kerek. Biz barlyǵymyz jýrnalıstermiz. Aýqymdy medıa salada ár túrli aqparattardy taratyp otyrmyz. Ókinishke qaraı, ózimizdiń quqyǵymyzdy qorǵaýǵa, birlesip ortaq strategııany qurýǵa ýaqyt taba bermeımiz», - deıdi ol.
Onyń aıtýynsha, MedıaAlıans medıa salada eńbek etetin barlyq adamnyń quqyǵyn qorǵaıtyn bolady. Buǵan qosa qoǵamdyq uıymnyń jumysy úsh baǵytta, atap aıtqanda, ókildik qyzmetti atqarý, medıatsııa boıynsha jumys júrgizip, medıa kózderi arasynda baılanysty retke keltirý boıynsha jumys atqarady. Armanjan Baıtasovtyń aıtýynsha, bekem medıa-ındýstrııa Qazaqstannyń durys baǵytta damýy jolynda bizdiń qoǵamǵa óte qajet.
Óz kezeginde Qazaqstan halqy Assambleıasy tóraǵasynyń orynbasary Darhan Myńbaı elimiz úshin medıa-birlestiktiń qurylýynyń mańyzy zor ekenin atap ótti.
«Jýyrda ǵana tirkelgen uıymnyń maqsaty týraly hattamada onyń buqaralyq aqparat quraldary qyzmetkerleriniń, shyǵarýshylardyń, mádenıet salasy qyzmetkerleriniń, saıasatkerler, qoǵamdyq qurylymdar, qaýymdastyqtar men odaqtar ókilderiniń basyn biriktirý kózdelip otyrǵany jazylǵan. Sonymen qatar, jańa uıymnyń jumysy 22 jyldyq tarıhy bar bizdiń Assambleıanyń qoǵam úshin eńbek etý, oıly adamdardy biriktirý, demokratııalyq qaǵıdattardy kúsheıtý, quqyqty qorǵaý jáne otandastarymyzdyń bostandyǵy turǵysynda jumysymen sáıkes keledi», - deıdi ol.
Sonymen qatar, jıyn barysynda QR Aqparat jáne kommýnıkatsııalar vıtse-mınıstri Alan Ájibaev, QR Din isteri jáne azamattyq qoǵam vıtse-mınıstri Abzal Núkenov, «Qazaqstan» RTRK» AQ Basqarma tóraǵasy Erlan Qarın sóz sóıledi.
Sezdiń qorytyndysy boıynsha Qazaqstandyq MedıaAlıanstyń basqarma quramyna qazaqstandyq aqparat salasynyń belgili on tulǵasy, al uıymnyń basqarma tóraǵasy bolyp Armanjan Baıtasov saılandy.
