Astanada Qazaqstandyq ınterventsııalyq kardıologtar jáne rentgenhırýrgtar qoǵamynyń І sezi ótti
ASTANA. 1 sáýir. QazAqparat - Búgin Ulttyq ǵylymı kardıohırýrgııalyq ortalyqtyń bazasynda «Qazaqstandyq ınterventsııalyq kardıologtar jáne rentgenhırýrgtar qoǵamy» respýblıkalyq qoǵamdyq birlestiginiń І sezi ótti,
dep habarlady pm.kz saıty.
«Ulttyq medıtsınalyq holdıngi» AQ-nyń baspasóz qyzmetiniń aqparatyna sáıkes, sez jumysyna Qazaqstannyń tanymal kardıologtary men hırýrgtary jáne halyqaralyq mamandar qatysty.
«Sezge qatysýshylar elimizdegi ınterventsııalyq kardıologııanyń damýyna qatysty ózekti taqyryptardy, qan tamyry hırýrgııasynyń problemalaryn, sonymen qatar zamanaýı emdeý tásilderin jan-jaqty talqyǵa saldy», - delingen habarlamada.
2011 jyldyń qazanynan bastap osy ýaqytqa deıin ortalyqta 2 myńnan astam naýqas emdeldi. Sonymen qatar 1 myńnan astam, onyń ishinde 300 balanyń týa bitken júrek aqaýyna ota jasaldy.
Ortalyqta alǵash ret jasandy júrekti ımplantatsııalaý boıynsha biregeı tehnologııa engizildi. Máselen, 2011 jyly sońǵy býynnyń Heart Ware qurylǵysy iske qosyldy. Sonyń arqasynda Qazaqstan ashyq júrekke biregeı joǵary tehnologııalarmen ota jasaıtyn álemniń eń damyǵan 22 eliniń qataryna kirdi.
