Astanada qazaqstandyq gınekolog dárigerler úshin jatyr hırýrgııasyna arnalǵan halyqaralyq sheberlik sabaq ótti
ASTANA. Sáýirdiń 5-i. QazAqparat /Gúlmıra Álıakparova/ - Búgin Ana men bala ulttyq ǵylymı ortalyǵynda (ABUǴO) Endoskopııalyq hırýrgııa halyqaralyq ortalyǵynyń basshysy Revaz Bochorıshvılı (Frantsııa qalasy) «Jatyr hırýrgııasy» taqyrybynda sheberlik sabaq ótkizdi,
dep habarlaıdy QazAqparat.
R. Bochorıshvılı Qazaqstannyń barlyq óńirinen jınalǵan gınekolog dárigerlerdiń nazaryna jatyr mıomasyn emdeýde halyqaralyq tájirıbede qoldanylatyn - laporaskopııalyq mıomektomııa, gısterektomııa, gısterorezektoskopııa jáne jatyr arterııalaryn embolızatsııalaý tásilderi týraly aıtyp berdi. Sheberlik sabaq barysynda sondaı-aq operatsııalyq blokta ABUǴO-nyń jetekshi mamandary jasap jatqan otanyń tikeleı translıatsııasy kórsetildi.
Búgingi kúni jatyr mıomasy áıelderde keń taraǵan qaterli emes isik túrleriniń biri. Biraq bul aýrýdy emdeý sol kúıinde kúrdeli jáne únemi jańa ádisterdi zertteýdi qajet etedi. Jatyr mıomasy 30 jastan asqan áıelderdiń 75 paıyzynda anyqtalady jáne olardyń sany jyl sanap artyp keledi.
ABUǴO medıtsınalyq dırektorynyń akýsherlik jáne gınekologııa jónindegi orynbasary Talshyn Úkibasovanyń aıtýynsha, 2009 jyly Ortalyqtyń gınekologııa bólimi 2 myńǵa jýyq áıelge ota jasasa, onyń 60-65 paıyzy jatyr mıomasyna jasalǵan. Olardyń eń jasy - 20-da bolǵan. Búgingi kúni jatyrdyń qaterli emes isiginiń paıda bolý sebepterin eshbir dáriger dóp basyp aıta almaıdy. Mıoma kóp jaǵdaıda garmonaldyq qyzmetterdiń buzylýynan, strestik jaǵdaılar men qorǵanysh tapshylyǵynyń azaıýynan bolady dep boljanady. «Jatyr mıomasy jatyrdyń óziniń aýrýy emes, ol aǵzada bolǵan keshendik ózgeristiń saldarynan týyndaıtyn kesel», - deıdi T.Úkibasova.
Aıta keteıik, R. Bochorıshvılı usynyp otyrǵan endoskopııalyq ádister, onyń ishinde laparoskopııa jáne gısteroskopııa ABUǴO-da medıtsınalyq mekeme ashylǵan kúnnen bastap qoldanylyp keledi.
«Qazir endeskopııalyq qurylǵylar oblystyq jáne aýdandyq ortalyqtarda da bar. Búgingi dáristiń maqsaty - ABUǴO-nyń jáne halyqaralyq tájirıbelerdiń negizinde bul tásildiń keńinen qoldanylýyn nasıhattaý. Sebebi ishke tilik jasaý arqyly mıomany nemese bala kóteretin organdardy alyp tastaý eski ádister bolyp tabylady», - deıdi ol.
Laparoskopııa jáne gısteroskopııa - áıelderdi bala tabý múmkindikterinen aıyrmaıtyn, jatyr qýysyna az áser etetin qansyz otalar. «Úlken otalardyń ózinde naýqas 10-15 ml. ǵana qan joǵaltady», - deıdi T.Úkibasova.
