Astanada Qazaqstandaǵy jetim balalar týraly derekti fılminiń tusaýy kesildi
Atalmysh shyǵarma «Meıirimdilik» erikti qoǵamy» qorynyń "Balalarǵa ómir syıla!" dep atalatyn aktsııasy aıasynda túsirilgen. Bul 2007 jyldan beri túsirilgen tórtinshi fılm.
Sharaǵa fılmniń basty keıipkerleri bolǵan balalar jáne olardyń ata-analary, eriktiler, qoǵam qaıratkerleri, BAQ ókilderi, kómek kórsetken dárigerler men kompanııalar qatysty.
"Olardyń ómirleri erekshe, janǵa jylý syılaıdy. Fılmde túrli oqıǵalar bar, biraq onyń barshasy kórermenniń kóńil sherin qozǵamaı qoımaıdy jáne óz ómirińe basqa qyrynan qaraýǵa ıtermeleıdi. Fılmniń árbir keıipkeri "Jetimdersiz Qazaqstan" uǵymyna ózderiniń úlesterin qosty", - dep atap ótti «Meıirimdilik» erikti qoǵamy» qorynyń dırektory Arýjan Saın.
Mysaly, Aqmola oblysy Kenesary aýylynyń turǵyny Murat Qabylbaev pen onyń zaıyby Orynbasar túrli ulttan 11 balany asyrap alǵan. Qapshaǵaıdaǵy Marııa men Andreı bolsa, aýyr syrqatqa dýshar bolǵan 16 balany ólim aýzynan aman saqtap, olarǵa otbasy bola bildi. Elena esimdi zańger ana jylýynan úzilgen Rınatqa analyq meıirim syılady. Talǵarda turatyn Marına "Kovcheg" atty otbasy úıinde 55 jetimdi baǵyp-qaǵyp otyr.
Janna Balaqaevanyń aıtýynsha, fılm jelisi taǵdyrlary toǵysqan jandardyń, jetimder úıinde ósken balalardyń, olarǵa jylý syılaǵan áke men ananyń áńgimeleri men estelikterinen turady.
"Men eshqashan ondaı tragedııany bastan keshken emespin. Aramyzda kópshiligimiz sııaqty kóp estigenim ǵana bolmasa. Biraq balalarǵa baryp, olardyń janaryndaǵy muńdy kórgende, boıyńa qorqynysh uıalaıdy. Ókinishke oraı, fılmniń uzaqtyǵy 65 mınýt qana. Oǵan aıtýǵa turarlyq áli qanshama oqıǵalar kirmeı qaldy. Onyń ústine jetimder úıinen shyqqan túlekterdiń basym bóligi qoǵamnyń túsinbeýshiligine ushyraýdan seskenip, kameraǵa túsýden bas tartty", - deıdi J. Balaqaeva.
Arýjan Saınnyń atap ótkenindeı, atalmysh týyndy "Samuryq-Qazyna" qorynyń jáne tanymal rejısser Ermek Tursynovtyń jeke qorynyń demeýshiligimen shyqqan.
"Ermek Tursynov balalarǵa kómegin aıaǵan emes. Ol onkologııalyq ortalyqqa baryp, ondaǵy balaqaılardy qýanysh bólep, olarǵa túrli káde-syılyqtar taratyp júrdi. Búgingi týyndy da "Samuryq-Qazyna" jáne tanymal rejısser Ermek Tursynovtyń jeke qorynyń demeýshiligimen túsirildi", - deıdi ol.
Kınoteatrda arnaıy tilek bılbordy turdy. Kınodan áser alǵan kez kelgen kórermen sonda fılm keıipkerlerine, jetim balalarǵa júrekjardy tilekterin jazyp, bala asyrap alýdy oılap júrgen ekioıly azamattarǵa óz úndeýlerin qaldyra alady. Uıymdastyrýshylar sol úndeýlerden beınerolık jasap, jetimder úıin panalaǵan balalardy asyrap alýǵa júrekteri daýalamaı júrgen qazaqstandyqtarǵa taǵy da oı salýdy kózdeýde.
"Men sııaqtylar jetimder úıinde kóp boldy. Biz toppen uıyqtadyq, toppen tamaqtandyq. Keıde qas qaraıǵanda, uıqyǵa keter aldynda, kúndizgi úreı men kúızelisti bir sátke bolsa da umytý úshin biz armanǵa shomyp ketetinbiz. Árıne barlyǵynda bir ǵana negizgi arman bolatyn. Túsimde men ata-anamdy, aǵalarymdy jáne ápke-qaryndastarymdy kóretinmin. Sol sátte uıqydan oıanǵyń kelmeıtin", - deıdi fılm keıipkerleriniń biri Azız Zaırov.