Astanada Qazaqstandaǵy jáne shet elderdegi halyqaralyq bilim berý baǵdarlamalarymen tanystyratyn jármeńke ótti
ASTANA. 11 mamyr. QazAqparat /Gúlmıra Álıakparova/ - Búgin Astanada bilim qýǵan qazaqstandyq jastar úshin halyqaralyq bilim berý baǵdarlamalary usynylǵan jármeńke uıymdastyryldy.
«Kedergisiz bilim alý» dep atalatyn osymen 9-shy márte ótkizilip otyrǵan jyl saıynǵy bilim berý jármeńkesin eki jyl qatarynan QR Tuńǵysh Prezıdentiniń murajaıy uıymdastyryp keledi.
Jármeńkege AQSh, Ulybrıtanııa, Frantsııa, Germanııa jáne Reseı elderinen barlyǵy 18 bilim berý mekemesi qatysty. Olardyń arasynda sondaı-aq, QR Prezıdentiniń «Bolashaq» halyqaralyq baǵdarlamasy bar. Jármeńke barysynda jastar sheteldik baǵdarlamalar boıynsha Qazaqstan Respýblıkasynda jáne shet elderde tegin jáne aqyly negizde bilim alý múmkindikterimen tanysty. Halyqaralyq baǵdarlamalar boıynsha bilim alýdy usynyp otyrǵan Halyqaralyq bilim berý ortalyqtarymen jáne ýnıversıtettermen baılanysýǵa bolatyn málimetterdi, memleket jáne jekemenshik qorlar usynatyn bilim berý granttary týraly, Astana qalasyndaǵy tildi úıretý kýrstary týraly aqparattar aldy. Sonymen birge, magıstranttar men doktoranttardy sheteldik mamandar daıarlaıtyn qazaqstandyq JOO-lar týraly derekter alyp, mektepterge, JOO-larǵa jáne jumysqa ornalasý úshin óziniń shet el tilin bilý deńgeıin tekseretin sertıfıkatsııalyq emtıhandardy (TOEFL, SAT, GMAT, DELE, Start Deutshc 1 jáne 2, Zertifikat Deutshc jáne t.b.) tapsyrý múmkindigine ıe boldy.
QR Tuńǵysh Prezıdenti murajaıy dırektorynyń orynbasary Botagóz Qaıypovanyń aıtýynsha, ótken jyly ótkizilgen jármeńkeniń nátıjesi boıynsha 500 jas óren túrli sheteldik baǵdarlamalar boıynsha bilim alýǵa ótinimder jasaǵan. Jármeńke aıaqtalǵannan keıin de habarlasqandar kóp bolǵandyqtan, bıyl jastardyń sany ótken jylǵa qaraǵanda áldeqaıda asyp túsedi dep kútilýde.
Uıymdastyrýshylardyń pikirinshe, mundaı jármeńkelerdiń artyqshylyǵy - jastar baǵdarlamalardy uıymdastyrýshylarmen júzbe-júz kezdesip, qyzyqtyrǵan suraqtaryna jaýapty birden ala alady.
Aıta keteıik, 2003 jyly Halyqaralyq bilim berý ortalyǵynyń assambleıasy quryldy. Búgin onyń quramyna 20 mekeme enip otyr, onyń ishinde Halyqaralyq zertteýler men almasýlar boıynsha keńes (IREX), Reseılik yqpaldastyqtyń Qazaqstan Respýblıkasyndaǵy ókildigi, «Bilim - Ortalyq Azııa» Bilim berý ortalyǵy, S.Seıfýllın atyndaǵy Qazaq agrotehnıkalyq ýnıversıteti, «Astana medıtsınalyq ýnıversıteti» AQ jáne basqalary bar.
