Astanada «Qazaqstandaǵy jalpyǵa birdeı aqparatqa qoljetimdilik» atty atty halyqaralyq konferentsııa ótýde

dep habarlaıdy QazAqparat.

Atalmysh sharany Ádilet mınıstrligi ıÝNESKO-nyń qoldaýymen uıymdastyryp otyr. Konferentsııanyń maqsaty aqparatqa qoljetimdilik máselesine arnalǵan zań jobasynyń basty ıdeıalary jóninde pikir almasyp, qujatty daıyndaýshylarǵa tıisti aqyl-keńester men aqparattar berý bolyp otyr. Osyǵan qaraı jıyn barysynda atalmysh máseleler jóninde Parlament depýtattary men memlekettik organdardyń jáne halyqaralyq uıymdar men saıası partııalardyń ókilderi arnaıy baıandamalar jasaıdy.

Otyrys barysynda kún tártibindegi másele jóninde sóz qozǵaǵan ádilet vıtse-mınıstri Marat Beketaevtyń sózine qaraǵanda, jalpyǵa birdeı aqparatqa qoljetimdilikke elimizdegi ulttyq zańnamalar kepildik bere alady. Soǵan qaramastan memlekettik jáne zańmen qorǵalatyn  birqatar qupııalardan ózge aqparattardyń barlyǵy kópshilikke qoljetimdi bolýy tıis. «Qazirgi tańda álemde jelilik negizde aqparat almasýǵa múmkindik beretin túrli baǵdarlamalar keńinen taraı bastady. Olar azamattardyń bir-birimen baılanysýyna da memlekettik organdardyń da ózara málimettermen bólisýine múmkindik beredi. Qazaqstan Respýblıkasynda bul úderis «Elektrondyq  úkimet» jobasyn júzege asyrý sharalarynan kórinip otyr. Osy arqyly memlekettik jáne ózge de organdardyń basshylary azamattarmen tikeleı baılanysqa shyǵý múmkindigine ıe bolyp otyr. Memlekettik organdardyń aqparattyq saıttary da ashyldy. Elektrondy jolmen qujat almasý sharalary jolǵa qoıyldy. Osynyń barlyǵy da eldegi qoljetimdilikti qamtamasyz etetin arnaıy zańnyń bolýyn qajet etip otyr», dedi vıtse-mınıstr.

Onyń  sózine qaraǵanda, jalpyǵa birdeı aqparatqa qoljetimdilik máselesin qamtamasyz etetin zań jobasyn daıyndaý sharalary sátimen júzege asyrylsa, ol kelesi jyly Parlamenttiń qaraýyna engizilmek.