Astanada Qazaqstandaǵy tuńǵysh «Jeruıyq» rok-operasynyń premerasyna daıyndyq qarqyndy júrip jatyr
ASTANA. 11 qyrkúıek. QazAqparat - «Jeruıyq» rok-operasynyń ártisteri 14-15 qyrkúıekte ótetin premeralyq kórsetilimge daıyndalyp jatyr. Bul týraly astana.kz saıtyna qalalyq Mádenıet basqarmasynan habarlady.
Oryndaýshylardyń barlyǵy qoıylymǵa daıyndalyp jatyr, kóbi premera kúnin taǵatsyz kútýde. Nurlan Ónerbaev Asan Qaıǵyny somdaıdy, sonymen qatar mıýzıklge Baýyrjan Isaev, Svetlana Vasına, Baýyrjan Nurymbetov, Astana qalasy teatrlarynyń akterleri, «Terra» jáne «Naz» bı ujymdary qatysady.
«Biz qoıýshy-rejısser ıÝrıı Aleksandrovty, qoıýshy-sýretshi Vıacheslav Okýnevti shaqyrdyq. Olar elimizdiń tarıhymen, salt-dástúrimen tanys. Onyń ústine, bul - kúrdeli janr, bul - rok-mýzyka, ony jaqsy qoıý úshin has sheberler kerek. Mıýzıklde qazaqtyń «Dýdar-aı» halyq ánin qoldandym. Balet kóp bolady. Baletti qoıýǵa Sankt-Peterbordan baletmeıster shaqyryldy. Bul kórermenniń kóńilinen shyqsa, men ózimdi baqytty sezinemin», - dedi «Jeruıyq» rok-operasynyń avtory Tólegen Muhamedjanov astana.kz saıtyna bergen suhbatynda.
«Jeruıyq» rok-operasy janǵa jaıly, jeri nýly meken izdegen Asan Qaıǵy týraly ańyzǵa negizdelgen. Ol - jelmaıaǵa minip, jer jannatyn izdegen abyz, jyraý, uly fılosof, memleket qaıratkeri. Asan Qaıǵy túıelerge júk artyp, qazaq dalasyn túgel sharlap shyqqan. Rejısserdyń jelisi boıynsha, qoıylym sońynda Asan Qaıǵy Saryarqanyń tórinen janǵa jaıly jer tabady. Bul - el bolashaǵynyń, Qazaqstan halqynyń jetistikteriniń sımvoly, jańashyldyqtyń aınasy bolǵan Astana.
Eske salaıyq, rok-operanyń tusaýkeseri 14-15 qyrkúıekte Beıbitshilik jáne Kelisim saraıynda saǵat 18.00-de ótedi.
