Astanada Qazaqstandaǵy myńjyldyq damý maqsattarynyń esebi tanystyryldy
ASTANA.Qazannyń 25-i. QazAqparat /Aıdar Ospanalıev/ - Búgin Syrtqy ister mınıstrliginde Qazaqstan Úkimeti men elimizdiń BUU-daǵy Ókildigi birlesip daıyndaǵan Qazaqstandaǵy myńjyldyq damý maqsattarynyń esebi tanystyryldy.
Esterińizge salaıyq, 2000 jyldyń qyrkúıeginde Nıý-Iorkte ótken Myńjyldyqtar sammıtinde BUU-na múshe memleketterdiń basshylary Memleketterdiń damýynyń negizgi maqsattary men mindetterin qamtıtyn Myńjyldyq deklaratsııasyn qabyldady. «Deklaratsııada kórsetilgen jáne elimizdiń damýyn qamtıtyn 8 maqsat 2015 jylǵa qaraı joqshylyqtyń shegine jetken azamattar sanyn eki esege qysqartýdy, sonymen birge Juqtyrylǵan qorǵanysh tapshylyǵynyń belgisi dertine shaldyqqandardyń sanyn azaıtýdy kózdeıdi. Qazaqstan BUU-nyń múshe memleketterdiń arasyndaǵy Myńjyldyqtar deklaratsııasyn qabyldaǵan jáne damýdyń maqsattary men mindetterin júzege asyrýdy moınyna alǵan elderdiń qatarynda. Osyǵan qaraı elimiz 2000 jyldan bastap, myńjyldyqty damytý boıynsha 3 ret esep shyǵardy», - dedi Syrtqy ister mınıstrliginiń baspasóz hatshysy Іlııas Omarov.
Onyń aıtýynsha, Qazaqstandaǵy myńjyldyq damý maqsattarynyń alǵashqy esebi 2002 jyly jarııalandy jáne ol Shyǵys Eýropa men TMD aýmaǵyndaǵy alǵashqy esep boldy. 2005 jyly ekinshi esep jarııalanyp, onda myńjyldyqtardy damytý sharalarynyń nátıjelerin saralaý men baǵalaý jumystarynyń qorytyndylary berildi. Al 2007 jyly úshinshi esep jarııalandy. «Qazaqstanda osy ýaqytta myńjyldyqtardy damytý maqsattaryna qatysty birqatar mindetter oryndaldy. Sońǵy esepte bizdiń ulttyq erekshelikterimiz ben ulttyq statıstıkamyzdyń tıisti memlekettik baǵdarlamalar negizinde qosymsha mindetter qoıylǵan», dedi baspasóz hatshysy.
