Astanada Qazaqstandaǵy qytaıtaný ǵylymynyń máseleleri talqylanbaq
ASTANA. QazAqparat - Qazan aıynyń 10 juldyzynda L.N.Gýmılev atyndaǵy Eýrazııa ulttyq ýnıversıtetinde «Qazaqstandaǵy qytaıtaný ǵylymy: tarıhy, búgini men bolashaǵy» atty halyqaralyq ǵylymı-tájirıbelik konferentsııa ótedi.
Shara Qazaqstannyń eńbek sińirgen qaıratkeri, qytaıtanýshy-ǵalym, fılologııa ǵylymdarynyń doktory, professor, aqyn ári aýdarmashy Dúken Másimhanulynyń 50 jyldyq mereıtoıyna oraı uıymdastyrylǵan. Aıta keteıik, D.Másimhanuly Qazaqstan Jazýshylar odaǵynyń halyqaralyq «Alash» ádebı syılyǵynyń jáne ShYU-nyń «Jibek joly: gýmanıtarlyq yntymaqtastyq» syılyǵynyń ıegeri. Sondaı-aq konferentsııa barysynda ǵalymnyń «Tarıhshylardyń ulttyq kongresi kitaphanasy» serııasy boıynsha «Folıant» baspasynan jaryq kórgen «Qytaı týraly qyryq sóz» atty zertteý kitabynyń tusaýkeser rásimi ótkizilmek. Kelemin deýshilerge esik ashyq, dep habarlaıdy kazaitys.kz.
