Astanada Qazaqstandaǵy kámeletke tolmaǵandardyń quqyqtaryn qorǵaý máseleleri jónindegi yntymaqtastyqqa qol qoıyldy (FOTO)

ASTANA. QazAqparat - Búgin Astanada Bas prokýror Ashat Daýylbaev pen Balalar quqyqtary jónindegi ýákil Zaǵıpa Balıeva kámeletke tolmaǵandardyń quqyqtaryn qorǵaý máseleleri boıynsha ózara yntymaqtastyq týraly memorandýmǵa qol qoıdy, dep habarlady QR Bas prokýratýrasynyń baspasóz qyzmeti.

Kelisimge qol qoıýdyń mańyzdylyǵyn jetkize otyryp, A.Daýylbaev balalardyń amandyǵyn jáne qorǵalýyn qamtamasyz etý memlekettiń negizgi ulttyq basymdyqtarynyń biri bolyp tabylatynyn atap kórsetti. Sondaı-aq, Bas prokýror atap ótkendeı, Balalar quqyqtary jónindegi ýákil ınstıtýtyn qurý balalyqtyń sózsiz qorǵalýy kerektigi týraly konstıtýtsııalyq normany júzege asyrýdyń kezekti bir qajetti qadamy boldy.

Memorandým aıasynda taraptar balalardyń quqyqtary men múddelerin qorǵaý salasyndaǵy kókeıkesti máselelerdi sheshýge, problemalyq suraqtardy anyqtaýǵa jáne olardy sheshý jolyndaǵy keshendi sharalardy qabyldaýǵa baǵyttalǵan kúsh-jigerdi biriktirýge nıetti.

Qujattyń negizgi maqsaty is-árekettiń ashyqtyǵy jáne tıimdiligi qaǵıdalary negizinde balalar quqyqtarynyń kepildigi men zańdy múddelerin qamtamasyz etý, olardyń buzylǵan quqyqtary men bostandyqtaryn qalpyna keltirý boıynsha birlesken jáne kelisilgen áreketter jasaý bolyp tabylady.

Júrgizilip otyrǵan jumystardyń tıimdiligin arttyrý jónindegi ortaq usynystardy júzege asyrý úshin taraptar ózara is-qımyldyń ártúrli formalaryn paıdalanýǵa, aqparatpen turaqty almasýdy jolǵa qoıýǵa kelisti.

Atap aıtqanda, yntymaqtastyqty kámeletke tolmaǵandardyń quqyqtary men zańdy múddelerin qozǵaıtyn áreket etýshi zańnamany taldaý jáne olardy jetildirý boıynsha usynystar engizý, balalardyń quqyqtaryn qorǵaý salasyndaǵy aqparatpen turaqty almasý, azamattyq qoǵam ókilderimen baılanysty keńeıtý baǵyttarynda iske asyrý josparlanýda.

Sondaı-aq Bas prokýror kámeletke tolmaǵandardyń quqyqtaryn qorǵaý prokýratýra qyzmetiniń basym baǵyttarynyń biri bolyp tabylatynyn atap kórsetti.

2015 jyly kámeletke tolmaǵandar týraly zańnamanyń qoldanylýyn qadaǵalaý salasynda 2 278 tekseris júrgizildi, 91 614 zań buzýshylyq anyqtaldy, 2 498 usynys qaraldy, 181 narazylyq qanaǵattandyryldy, yqpal etý sharalary boıynsha 354 zańsyz aktiniń kúshi joıyldy jáne ózgertildi, 1 209 zańdy túsindirý júrgizildi, 715 aldyn-ala eskertý jarııalandy.

Prokýrorlyq qadaǵalaý sharalarymen 8 302 tulǵa tártiptik, 2 707-si ákimshilik, 323-i materıaldyq jaýapkershilikke tartyldy, 54 qylmystyq quqyq buzýshylyq boıynsha sotqa deıingi tergeý bastaldy. 269376 kámeletke tolmaǵandardyń konstıtýtsııalyq quqyqtary qorǵaldy.