Astanada Qazaqstandaǵy alǵashqy otandyq taýarlar sýpermarketi ashylady (FOTO)
Saýda ortalyǵynda óńirlerden ákelingen qazaqstandyq taýarlar ǵana satylmaq. Jobanyń maqsaty - otandyq taýar óndirýshilerdi qoldap qana qoımaı, sheteldik týrısterdiń qyzyǵýshylyǵyn týdyratyn saýda ornyn ashý.
QR Ulttyq kásipkerlik palatasynyń qoldaýymen astanalyq isker áıel qazaqstandyq brend dep ataýǵa laıyq taýarlardy izdeýge shyqty.
Jambyl oblysynda A.Nurlanova taýar óndirýshilermen kezdesip, ónimderdi jetkizý boıynsha kelissózder júrgizdi. Munda kásipkerdi shujyq jáne makaron ónimderi, jaıma, «Shırınkomsharg» JShS tátti ónimderi qyzyqtyrdy. Keı jambyldyq taýar óndirýshilerge taýardy bezendirýde ózgerister engizý usynyldy.
«Atameken» saýda ortalyǵy týraly A.Nurlanova tolyq baıandap berdi:
«Astanada sol jaǵalaýdaǵy elıtalyq aýdanda ǵımarat daıyn. Keıin oń jaǵalaýda da ashatyn shyǵarmyz. Sýpermarket qazaq ulttyq stılinde bolady, dızaınerlik jumysy, sóreleri erekshe bolmaq. Sýpermarkettiń bir bólimine sertıfıkaty bar, ekologııalyq qaýipsiz jáne dámdi otandyq azyq-túlik ónimderin qoıamyz. Balalar taǵamyna qoıylatyn basty talap: barlyǵy tabıǵı bolýy tıis. Bizdiń taýarlardyń ımporttyq taýardan artyqshylyǵyn kem degende úsh tilde aıtatyn qyzmetkerler bolady. Sýpermarkettiń ekinshi bóliminde kıim, tósek-oryn zattary, ulttyq sývenırler qoıylǵan býtıkter bolady. Úshinshi bóliminde «Úshqońyr» meıramhana-galereıasy ornalaspaq. Ol kıiz úı túrinde bolady. Qazaqstanda alǵash ret meıramhanada otandyq ónim qoıylady. Bul ulttyq stıldegi kilemder, kartınalar, qolóner shyǵarmashylyǵynyń buıymdary, zergerlik buıymdar. Qonaqtarǵa bizdiń ulttyq taǵamdarymyz ǵana usynylady. Biz ulttyq stılde úı salyp, bezendirip, kelgenderdi tamaqtandyrýǵa bolatynyn dáleldemekpiz», - dedi kásipker.
Eldiń barlyq aımaǵynda «Atameken» SO fılıaldaryn ashý josparda bar.
