Astanada Qazaqstanda jasalǵan ıadrolyq synaqtar jónindegi derekti fılm kórsetildi
Fılm Qazaqstannyń jáne Tuńǵysh Prezıdent - Elbasy Nursultan Nazarbaevtyń jahandyq antııadrolyq bastamalaryn qoldaýǵa baǵyttalǵan.
Brıtanııalyq rejısser Andre Zıngerdiń atalmysh dokýmentaldy fılminde qyrǵı-qabaq soǵys kezinde 40 jyl boıy iri derjavalardyń óz halqynyń basyn qaterge tige otyryp, jer betinen kúlli adamzatty joıyp jibere alatyn qýaty bar qarýdy qalaı jasaǵandary jóninde baıandaldy.
«Qazirgi ýaqytta álemde 15 myńnan astam ıadrolyq qarý bar, olardyń árqaısysy Hırosımaǵa tastalǵan bombalardan 300 ese qýatty. Biz búgin kórgen fılm ıadrolyq qarýdyń adamzat úshin qaýiptiligin taǵy bir aıqyndap, ár adam bul kúrdeli máseleni abstraktsııa emes, jeke basyna tóngen qaýip retinde qabyldaý kerektigin kórsetedi», - dedi Halyqaralyq qaýipsizdik jáne saıasat ortalyǵynyń dırektory Álimjan Ahmetov.
«Kýda dýl veter» fılminde KSRO men AQSh-ta bolǵan ıadrolyq synaqtar men sol zulmat synaq alańdary mańynda shoǵyrlanǵan halyqtyń densaýlyǵyna jasaǵan keri áseri týraly aıtylady. Sonymen qatar, fılm «Nevada-Semeı» qozǵalysynyń eki eldiń belsendileri men zardap shekken azamattaryn biriktire otyryp, Semeı ıadrolyq polıgonyn jabýǵa jasaǵan áreketteri men ózge polıgondarda synaq júrgizýdi toqtatýǵa qalaı qol jetkizgenderin sýretteıdi.
Fılmde ıadrolyq synaqtarǵa jalpy tyıym salý Kelisiminiń jasalýyna sebepshi bolǵan Nursultan Nazarbaevtyń strategııalyq durys sheshimi men saıası kóregendiginiń halyqaralyq deńgeıde qabyldanýy men gýmanıstik mańyzyna nazar aýdarylady.
Kórsetilimge qatysý úshin Astanaǵa fılmniń bas keıipkerleriniń biri, ATOM jobasynyń qurmetti elshisi Káripbek Kúıikov arnaıy keldi.
Sonymen qatar, Qazaqstannyń antııadrolyq bastamasynyń mańyzdylyǵyn Sheıtsarııanyń Qazaqstandaǵy tótenshe jáne ókiletti elshisi Ýrs Shmıd, Ýkraınanyń Qazaqstandaǵy tótenshe jáne ókiletti elshisi Ivan Kýleba, QR SІM orynbasary Roman Vasılenko men M. Nárikbaev atyndaǵy KAZGıÝÝ ýnıversıtetiniń vıtse-prezıdenti keńinen talqylady.
