Astanada Qazaqstan–Aýǵanstan saýda baılanystaryn keńeıtý joldary talqylandy
ASTANA. KAZINFORM — QR Premer-mınıstri Oljas Bektenov Astana halyqaralyq forýmyna qatysý úshin kelgen Aýǵanstan saýda jáne ónerkásip mınıstriniń mindetin atqarýshy Nýrıddın Azızımen kezdesý ótkizdi, dep habarlaıdy Úkimettiń baspasóz qyzmeti.
Onda saýda-ekonomıkalyq yntymaqtastyqty nyǵaıtý máseleleri talqylandy. Kólik-logıstıka, geologııalyq barlaý, aýyl sharýashylyǵy, tsıfrlandyrý, densaýlyq saqtaý, bilim berý jáne taǵy basqa salalardaǵy ózara is-qımyldy keńeıtýge nazar aýdaryldy.
Otandyq taýarlar eksportyn ártaraptandyrýǵa basa nazar aýdara otyryp, saýda-ekonomıkalyq yntymaqtastyqty jandandyrý jónindegi sharalar qaraldy. Qazaqstan Aýǵanstannyń negizgi saýda seriktesteriniń ondyǵyna kiredi. Ótken jyly taýar aınalymy $545,2 mln-dy qurady, onyń ishinde qazaqstandyq ónimniń eksporty – $527,7 mln.
Týrgýndı-Gerat transaýǵan temir jolyn salý máseleleri talqylandy. Jobany iske asyrý óńir úshin strategııalyq mańyzǵa ıe. Aýǵanstan Ortalyq jáne Ońtústik Azııa arasyndaǵy kópir bolyp sanalady jáne «Soltústik-Ońtústik» dáliziniń tıimdiligin arttyrýda mańyzdy ról atqara alady. Aýǵanstan aýmaǵynda qatty paıdaly qazbalardy geologııalyq barlaý, óndirý jáne óńdeý boıynsha birlesken jobalardy iske asyrýǵa otandyq kompanııalardyń qatysý josparlary qaraldy.
Tsıfrlandyrý salasynda qazaqstandyq tarap Aýǵanstanda jańa tehnologııalardy engizý boıynsha konsýltatsııalar men strategııalardy birlesip ázirleýdi jalǵastyratyn bolady.
— Qazaqstan óńirdiń ornyqty damýy úshin halyqaralyq qoǵamdastyqtyń kúsh-jigerin shoǵyrlandyrýǵa umtylady. Búginde elimiz Aýǵanstannyń negizgi saýda seriktesteriniń ondyǵyna kiredi jáne Aýǵanstandaǵy azyq-túlik daǵdarysyn eńserý boıynsha halyqaralyq seriktestermen jáne uıymdarmen belsendi yntymaqtasady. Qazaqstan Aýǵanstan naryǵyna astyq pen unnyń senimdi jetkizýshisi bolyp qala beredi. Astyqtyń basqa túrlerin, mal sharýashylyǵy ónimderin, kondıterlik jáne un ónimderin jetkizýdi bastaýǵa daıynbyz. Jalpy, biz taýarlar nomenklatýrasyn keńeıtýge múddelimiz. Sol úshin Gerattada «Qazaqstannyń saýda úıin» ashtyq jáne Kabýlda da qazaqstandyq saýda úıin ashýǵa nıettimiz, — dedi Oljas Bektenov.
Nýrıddın Azızı Aýǵanstannyń Qazaqstanmen birlesken jobalardy iske asyrý salasyndaǵy ózara is-qımyldy keńeıtýge múddeliligin jetkizdi. Kezdesýge qatysýshylar qazaqstandyq aýyl sharýashylyǵy tehnıkasyn Aýǵanstan naryǵyna eksporttaý perspektıvalaryn erekshe atap ótti.
— Qazaqstan biz úshin saýda salasyndaǵy mańyzdy áriptes bolyp sanalady. Bul baǵytta biz birlesip iske asyrýǵa bolatyn áleýetti kórip otyrmyz. Bizdi IT salasyndaǵy qazaqstandyq tehnologııalar, aýyl sharýashylyǵy salasyndaǵy óndiris qyzyqtyrady. Sizderdiń ónimderińizdiń sapasy basqa eldermen salystyrǵanda eń joǵary.Qazaqstanda óndiriletin aýyl sharýashylyǵy tehnıkasyna da qyzyǵýshylyq bar, — dep atap ótti Nýrıddın Azızı.
Budan bólek, jaqynda Almatyda ashylǵan BUU Óńirlik ortalyǵynyń Ortalyq Azııa jáne Aýǵanstan úshin ornyqty damý maqsattary jónindegi qyzmetine nazar aýdaryldy, ol óńirdiń turaqtylyǵyn nyǵaıtýǵa jáne qarqyndy damýyna eleýli úles qosady.
Kezdesý qorytyndysy boıynsha taraptar barlyq perspektıvaly baǵyttar boıynsha jan-jaqty ózara tıimdi yntymaqtastyqty nyǵaıtý nıetterin jetkizdi.
Buǵan deıin Úkimette TMU-ǵa múshe memleketter arasyndaǵy ózara yntymaqtastyq talqylandy