Astanada «Qazaqstan stýdentteriniń alıansy» aımaqtyq kóshbasshylarynyń sleti ótýde

«Qazaqstan stýdentteriniń alıansy» uıymynyń respýblıkalyq kóshbasshysy Shyńǵys Beskempirovtyń aıtýynsha, eki kúnge mejelengen sharanyń negizgi taqyryby Batys Qazaqstan oblysynda oryn alǵan sý tasqyny apatynan zardap shekken aýdandarǵa jáne turǵyndarǵa kómek kórsetý máselesi bolmaq.

Slet jumysyna elimizdiń 24 qalasynan kelgen aımaqtyq QSA jetekshileri men belsendi jastary qatysýda. Búgingi tańda QSA Batys Qazaqstan oblysyndaǵy jaǵdaıǵa oraı arnaıy shtab qurǵan. Olar barlyq stýdentterdi jumyldyryp, «Nur Otan» HDP-niń «Jas Otan» jastar qanatynyń bastamasymen kóterilgen «Jastar Otanǵa» respýblıkalyq jastar aktsııasynyń aıasynda zardap shekken turǵyndarǵa alǵashqy kómek zattaryn jınap, BQO aýdandaryna joldaýda. «Jigitter ózderiniń erikterimen kómekterin usyndy. Bul márttik - jas qazaqstandyqtar úshin laıyqty mysal bolmaq. Bul eldiń taǵdyryna, qazaqstandyqtardyń taǵdyryna jastardyń selqos qaramaıtynyn kórsetedi», - dedi Sh. Beskempirov.

Búgin sharanyń alǵashqy jumys kúninde Qazaq ulttyq óner ýnıversıtetinde QSA delegattarynyń elimizdiń saıasat jáne mádenıet qaıratkerlerimen «20 jyl toǵysynda» atty taqyrypta kezdesý uıymdastyryldy. Ashyq suhbat alańynda Qazaqstannyń memlekettik qaıratkerler men mádenıet salasyndaǵy belgili tulǵalar ózderiniń ómirlik jáne kásibı tájirıbelerimen bólisti.

Slet barysynda «Qazaqstan stýdentteriniń alıansy» respýblıkalyq qozǵalysynyń jumys jospary talqylanbaq. Onda uıymnyń 2011-2012 jyldarǵa arnalǵan strategııalyq jospary saralanady. «Slet kezinde biz elimizdiń 20 jyldyq táýelsizdigin merekeleýge arnalǵan is-sharalarǵa jiti toqtalamyz. Sebebi bul Qazaqstannyń eń eleýli de mereıli merekesi. Bizdiń QSA qatarynda elimizdiń Táýelsizdigimen qurdas jastar kóp»,-deıdi Sh. Beskempirov.

Qazirgi ýaqytta respýblıkalyq qoǵalys 149 JOO-nyń stýdentterin bir shańyraq astynda jumyldyryp otyrǵan eldegi iri stýdenttik uıym bolyp tabylady.