Astanada «Qazaqstan-Sırıýs» bilim berý ortalyǵy ashylady
ASTANA. KAZINFORM – Búgin elordada Memleket basshysy Qasym-Jomart Toqaev pen Reseı Prezıdenti Vladımır Pýtınge Astanada salynatyn «Qazaqstan-Sırıýs» bilim berý ortalyǵynyń irgetasyn qalaý jobasy kórsetildi.
Atap aıtqanda, Qazaqstan Prezıdenti Qasym-Jomart Toqaev pen elimizge memlekettik saparmen kelgen Reseı Prezıdenti Vladımır Pýtınniń qatysýymen ótken keńeıtilgen quramdaǵy kelissózderden keıin «Sırıýs» mektebi bastamasy tanystyryldy.
Bul rette Astanada daryndy balalarǵa arnalǵan «Qazaqstan – Sırıýs» mektebi ashylady. Munda oqýshylar qazaq jáne orys tilderinde oqytylmaq. Bilim baǵdarlamasynda jasandy ıntellekt, ınjenerııa, ǵarysh jáne ómir týraly ǵylymdar úılestirilmek.
- Búgin Astanada «Qazaqstan-Sırıýs» halyqaralyq bilim berý ınfraqurylymy jobasynyń kapsýlasy salynyp jatyr. Bul joba balabaqshanyń, halyqaralyq mekteptiń, sondaı-aq jastarǵa arnalǵan ǵylymı-tehnologııalar parkiniń qurylysyn qamtıdy. Bul jobanyń maqsaty – daryndy balalardy tárbıeleý, damytý jáne qoldaý, - dedi QR Oqý-aǵartý mınıstri Juldyz Súleımenova.
Aıta keteıik, jaqynda Syrtqy ister mınıstri Ermek Kósherbaev elimizge resmı saparmen kelgen RF Syrtqy ister mınıstri Sergeı Lavrovpen kezdesti.
E. Kósherbaevtyń atap ótýinshe, Qazaqstanda Reseıdiń 9 joǵary oqý ornynyń fılıaldary jumys isteıdi. Olardyń qatarynda halyqaralyq qatynastar salasy úshin erekshe mańyzdy Máskeý memlekettik halyqaralyq qatynastar ınstıtýtynyń fılıaly bar. Sondaı-aq ótken jyly Ál-Farabı atyndaǵy Qazaq ulttyq ýnıversıtetiniń Omby qalasynda fılıalynyń ashylýy da mańyzdy kórsetkish sanalady.
Qazaqstannyń 60 joǵary oqý orny Reseıdiń 50 ýnıversıtetimen áriptestik baılanys ornatqan.
Sonymen qatar Astana men Almatyda daryndy balalardy qoldaýǵa arnalǵan «Sırıýs» mektebiniń fılıaldaryn ashý josparlanyp otyrǵany málim boldy.
Sol sapary kezinde Sergeı Lavrov Reseıde 3 qazaq mektebi ashylatynyn aıtty.
Eske salsaq, bıyl qańtar aıynda Almatyda «Sırıýs» bilim berý ortalyǵymen yntymaqtastyq aıasynda I Talanttar sammıti ótti. Sammıt barysynda «Sırıýs» mektebi men bilim berý ortalyǵynyń irgetasyn qalaý rásimi ótti.
