Astanada Qazaqstan - Shotlandııa matchyna baılanysty kólik qozǵalysy shekteledi
ASTANA. QazAqparat - Búgin 21:00-de «Astana Arena» stadıonynda 2020 jylǵy Eýropa chempıonatyna irikteý kezeńi aıasynda Qazaqstan jáne Shotlandııa ulttyq quramalary alǵashqy kezdesýin ótkizedi, dep habarlaıdy QazAqparat.
Soǵan baılanysty elordanyń Qabanbaı batyr dańǵylyndaǵy Kereı, Jánibek handar kóshesinen Uly dala dańǵylyna deıingi kólik qozǵalysy shekteledi. Kólik qozǵalysy qaýipsizdigin saqtaý maqsatynda basymdyq qoǵamdyq kólikke beriledi.
Kórermenderge qolaıly bolýy úshin 19.00 - 20.00 aralyǵynda myna oryndardan arnaýly shattl-avtobýstar júredi:
- «Qazaqstan» SK turaǵy;
- «Nur Astana» meshitiniń turaǵy (shyǵys jaqtan);
- Astanalyq tsırktiń turaǵy (Qorǵaljyn tas joly jaǵynan).
Oıynnan keıin jankúıerlerdi qalaǵa tasymaldaý úshin avtobýstar «Astana Arena» stadıonynyń Qabanbaı batyr dańǵyly jaǵynda kútip turady.
