Astanada «Qazaqstan Respýblıkasynyń Ata Zańyna - 20 jyl» qujattyq kórmesi jumysyn bastady
Ulttyq muraǵattyń bas dırektory Marat Ábsemetovtiń aıtýynsha, kórmeniń ótkizýdiń basty maqsaty - qujattyq negizde qoǵam men memlekettiń basty Zańynyń daıyndalýy men qabyldaýy tarıhyn ashyp kórsetý. Osy oraıda onda muraǵattyń qorlarynan alynǵan túpnusqalyq qujattar qoıyldy. «Bıylǵy ataýly meıramǵa oraı Ata Zańymyzǵa baılanysty búkil qujattardy kópshilik nazaryna usynyp otyrmyz. Jalpy aıtqanda, búginde Qazaqstannyń damýyna, áleýetine Ata Zańymyzdyń nátıjeli bolýy yqpal etti. Sonymen qatar Konstıtýtsııamyzdyń arqasynda halqymyzdy álem elderi tanydy. Sondyqtan babalarymyzdyń armanyn búgingi urpaq kórip otyr», - dedi M.Ábsemetov. Sharaǵa memleket jáne qoǵam qaıratkerleri, QR Tuńǵysh Konstıtýtsııasyn daıarlaý boıynsha jumys tobynyń músheleri, QR Pralamentiniń depýtattary, QR Mádenıet jáne sport mınıstrliginiń ókilderi, tarıhshy ǵalymdar men muraǵatshylar qatysty. Aıta keteıik, qala turǵyndary men qonaqtary kórmeni bıylǵy qyrkúıektiń sońyna deıin tamashalaı alady.