Astanada «Qazaqstan Respýblıkasy qylmystyq atqarý zańnamasyn jetildirý» atty otyrys ótedi
ASTANA. 13 jeltoqsan. QazAqparat /Aıdar Ospanalıev/ - Erteń Qazaqstan Respýblıkasy Bas prokýratýrasy ınstıtýtynda «Qazaqstan Respýblıkasy qylmystyq atqarý zańnamasyn jetildirý» atty dóńgelek ústel ótedi.
Basqosýǵa Qazaqstan Respýblıkasy Joǵarǵy soty, Ádilet mınıstrliginen ókilder jáne tanymal quqyqtanýshy ǵalymdar men quqyq qorǵaý organdarynan tájirıbeli mamandar qatysady. Shara barysynda 2010-2020 jyldarǵa arnalǵan Quqyqtyq saıasattyń negizgi talaptaryn iske asyrýda qylmystyq atqarý zańnamasyn jetildirýdiń túıtkildi máseleleri talqylanady.
Naqtyraq aıtqanda, onda sottalýshyny qoǵamnan oqshaýlamaýmen baılanysty qylmystyq-quqyqtyq sharalardy keńinen qoldaný máselesi qaralady. Búginde sottalǵandardy tárbıeleý, olardy bas bostandyǵynan aıyrý oryndarynda ustaý, tárbıelik yqpal etý jumystary zańnamalyq turǵydan qamtamasyz etýdi qajet etip otyr. Osyǵan qaraı bul másele de otyrystyń kún tártibindegi basty taqyryptardyń bir bolady.
Sonymen qatar bas bostandyǵynan aıyrý oryndarynan bosaǵan azamattardy qoǵamnyń tolyqqandy múshesi retinde áleýmettik
ortaǵa qaıtarý nemese beıimdeý, sottalǵandar arasynda quqyq buzýshylyqtardyń aldyn alýǵa baǵyttalǵan keshendi zańnamalyq usynystar ázirleý de qylmystyq-atqarý salasyn damytýdaǵy ózekti máselelerdiń biri. Sondyqtan olardy otyrysqa qatysýshylar ortaǵa salady.
Dóńgelek ústel otyrysynyń qorytyndysy boıynsha oǵan qatysýshylardyń usynys-pikirleri negizinde elimizdiń qalmystyq-atqarý zańnamalaryn jetildirýge qatysty jáne Qazaqstannyń penıtentsıarlyq júıesin jalpy ońaltýǵa qatysty arnaıy usynystar qabyldanady dep kútilýde.
