Astanada Qazaqstan-Reseı dostyǵynyń alleıasy ashylady

ASTANA. KAZINFORM — Memleket basshysy Qasym-Jomart Toqaev  Reseı prezıdenti Vladımır Pýtınniń Qazaqstanǵa jasaǵan memlekettik sapary aıasynda ótken brıfıngide Astanada eki eldiń dostyǵyna arnalǵan alleıa ashylatynyn aıtty. 

«Biz ǵylymı jáne mádenı-gýmanıtarlyq salalardaǵy yntymaqtastyqqa úlken mán beremiz. Keshe Astanada Qazaqstan-Reseı tarıhshylarynyń ǵylymı forýmy ótti. Sonyń izin ala Almatyda eki eldegi eriktiler qozǵalystarynyń kóshbasshylary slet ótkizdi. Al erteń birlesken saraptamalyq keńestiń otyrysy ótedi. Bul is-sharalar eki el arasyndaǵy yntymaqtastyqty nyǵaıtýǵa eleýli úles qosýǵa baǵyttalǵan. Biz memlekettik deńgeıde aýqymdy mádenı-gýmanıtarlyq bastamalardy jan-jaqty jáne júıeli qoldaı beremiz», - dedi Qasym-Jomart Toqaev.

Qazaqstan Prezıdent Reseı tarabyna Astanadaǵy kóshpendiler oıyndaryna úlken delegatsııamen qatysqany úshin alǵys aıtty.

«Biz kelesi jyldyń kókteminde elorda turǵyndary men qonaqtary bos ýaqyttaryn jaıly ótkize alatyn Qazaqstan-Reseı arasyndaǵy máńgilik dostyqtyń alleıasyn ashý týraly sheshim qabyldaımyz. Múmkindikti paıdalana otyryp, Reseı tarapyna qyrkúıektiń basynda Astanada ótken besinshi Dúnıejúzilik kóshpendiler oıyndaryna belsendi qatysqany úshin alǵys bildirgim keledi. Reseı Federatsııasynyń atynan shamamen 180 ókil qatysyp, alýan sport túri boıynsha joǵary nátıje kórsetti», - dedi Prezıdent.