Astanada Qazaqstan Prezıdentine syıǵa berilgen saǵattar kollektsııasy kópshilik nazaryna usynyldy
ASTANA. QazAqparat - Búgin Astanadaǵy QR Tuńǵysh Prezıdenti mýzeıinde «Ýaqyt qudireti» kórmesi ashyldy. Alǵash ret mýzeı jınaqtarynan saǵattardyń kollektsııasy kópshilik nazaryna usynylyp otyr.
Kórmeni shyn máninde biregeı ári sırek dep aıtýǵa bolady, óıtkeni ekspozıtsııada saǵat jasaý óneriniń bıik shyńyna jetken 60-tan astam ár túrli jáne sırek kezdesetin týyndylar usynylady. Kollektsııanyń negizin Qazaqstan Respýblıkasy Tuńǵysh Prezıdenti mýzeıine memlekettik saqtaýǵa berilgen Nursultan Nazarbaevqa ár jyldarda tabys etilgen dıplomatııalyq syılyqtar quraıdy. Ereksheligine qaraı, kórmege qoıylatyn jádigerler arasynda mehanıkalyq, kvartsty jáne elektrondy saǵattar, syıǵa berýshilerdiń arnaıy tapsyrysymen jasalǵandar, HІH ǵasyrdan syr shertetin antıkvarlyq jáne basqa da kóptegen saǵattar bar. Kollektsııada qalta, qol, ústel, qabyrǵa, kamındik jáne edenge qoıylatyn saǵattar toptamasy erekshe kóz tartady. «Bul ekspozıtsııanyń QR Tuńǵysh Prezıdenti mýzeıiniń 2015 jylǵy kórme maýsymyn aıaqtaýyna sáıkes kelýi beker emes. Óıtkeni, ýaqyt jaıly oılanýǵa jáne onyń sonshalyqty jyldamdyǵyna bir sátke kóz júgirtip, jyldy qorytyndylaýǵa múmkindik beredi. Kórme merekelik shattyq kóńildi birge bólisýge jáne barlyq qonaqtarǵa jańajyldyq kóńil-kúı syılaıdy», - deıdi uıymdastyrýshylar. Aıta keteıik, kórme 2016 jyldyń 31 qańtaryna deıin jalǵasady.
