Astanada Qazaqstan polıtsııasynyń 25 jyldyǵyna arnalǵan baıqaý nátıjesi belgili boldy
ASTANA. QazAqparat - Osydan 25 jyl buryn «Qazaqstan Respýblıkasy ishki ister organdary» týraly Zańy qabyldanǵan bolatyn. Bul elimizde Qazaqstan polıtsııasynyń isteri men qyzmetin anyqtaıtyn eń alǵashqy qujat bolatyn.
Al 2007 jyly Elbasy Nursultan Nazarbaevtyń jarlyǵymen maýsymnyń 23 juldyzy resmı túrde «Qazaqstan polıtsııasy kúni» dep bekitildi.
Ózderińiz biletindeı, tártip saqshylarynyń jumysy tańǵy saǵat toǵyz ben keshki saǵat altynyń aralyǵynda ǵana shektelip qalýy múmkin emes. Olar halyqtyń tynyshtyǵyn kún, tún demeý kúzetedi. Odan qaldy árdaıym áleýmettik tártipti baqylaýda ustaıdy, qaýip-qaterdiń aldyn alady. Aıta ketý kerek, tóngen qaýipti aýyzdyqtaýda polıtsııa qyzmetkerleri óz basyn báıgege tigetin kezderi de az emes.
Qazaqstan polıtsııasy kúni - táýelsizdik jyldarynda atalǵan mańyzdy qyzmetti jolǵa qoıýdyń basy-qasynda bolǵan ardagerlerge jáne búgingi tańda osy salada ter tógip júrgen barsha azamattarǵa alǵys bildirýge arnalǵan kún. Buǵan qosa, 23 maýsym - beıbit zamanda elimizdiń tynyshtyǵy men qaýipsizdigi úshin óz ómirin qıǵan jandardy eske alý, olardyń arýaqtaryna qurmet kórsetý kúni bolyp tabylady.
Bıyl Іshki ister mınıstrligi ishki ister organdarynyń 25 jyldyǵyn merekeleý aıasynda qazaqstandyq polıtsııa týraly túrli nomınatsııa boıynsha úzdik shyǵarmashylyq jumysqa baıqaý uıymdastyrǵan bolatyn. Atalmysh baıqaýdyń negizgi maqsaty - elimizdiń óskeleń urpaǵynyń, jastardyń boıynda patrıottyq sezimdi tárbıeleý, polıtsııa kásibine qatysty oń kózqarasty qalyptastyrý jáne joǵarylatý. Sondaı-aq, shyǵarmashylyq jumystarǵa respýblıka turǵyndaryn tartý arqyly polıtsııa qyzmetkerleriniń jumystaǵy qyzyqty tustaryn, qyzmetter dástúrin ashý, oǵan qosa qyzmettik mindetterin oryndaý kezinde qaza tapqan qyzmetkerler men áskerı qyzmetshilerdi eske alý ispettes mindetter kózdeldi.
Aıta ketý kerek, Іshki ister mınıstrligi ishki ister organdarynyń 25 jyldyǵy aıasynda ótkizilgen shyǵarmashylyq baıqaý júzege birneshe nomınatsııa boıynsha asyryldy. Atap aıtsaq, olar: «Úzdik promorolık» jáne «Úzdik PR-maqala» atalymdary. Sondaı-aq, úzdik shyǵarma men «Obektıvte - qazaqstandyq polıtsııa» taqyrybanda «Úzdik fotokontent» nomınatsııasy boıynsha úzdik fotosýret baıqaýy da qatar jarııalandy.
Shyǵarmashylyq baıqaýdyń bastaý alǵandyǵy týraly aqparat áleýmettik jelilerdegi Іshki ister mınıstrliginiń resmı paraqshalarynda sáýir aıynyń ortasynda jarııalanǵan bolatyn. Al úmitkerlerdiń jumystary 1-31 mamyr aralyǵynda qabyldandy. Jýyrda ǵana, ıaǵnı Astana kúnin merekeleý qarsańynda atalmysh shyǵarmashylyq baıqaýdyń qorytyndylary belgili boldy. Baıqaý jeńimpazdary Іshki ister mınıstrliginiń áleýmettik jelilerdegi resmı paraqshalarynda ınternet qoldanýshylardyń táýelsiz daýys berý nátıjesinde anyqtaldy.
Sonymen, Astana qalasynyń turǵyny Arnaı Ormashtyń túsirgen sýreti «Obektıvte - qazaqstandyq polıtsııa» fotobaıqaýynyń úzdik týyndysy bolyp tanyldy. Al «Polıtsııa - balalardyń kózimen» atty 12 jasqa deıingi balalar arasyndaǵy sýret baıqaýynda astanalyq 9 jasar Anýarbek Ramazannyń eńbegi eldi súısindirdi. Sondaı-aq, «Eń úzdik rolık» nomınatsııasy boıynsha Astana qalasynyń turǵyny Rýstem Kabı kósh bastasa, «Eń úzdik maqala» avtory bolyp, pavlodarlyq Aıdana Qýanysheva tanyldy.
Atalǵan shyǵarmashylyq jumys ıelerine Qazaqstan respýblıkasynyń Іshki ister mınıstriniń dıplomy men baǵaly syılyqtar tabys etildi.
