Astanada Qazaqstan mýzeıleriniń biryńǵaı tsıfrlyq júıesi tanystyryldy
ASTANA. KAZINFORM — QR Ulttyq mýzeıinde E-museum portalynyń prezentatsııasy ótti. Joba elimizdegi mýzeılerdiń biryńǵaı tsıfrlyq keńistigin qalyptastyrý maqsatynda, Memleket basshysy aıqyndaǵan mindetter aıasynda júzege asyryldy, dep habarlaıdy Mádenıet jáne aqparat mınıstrligi.
Qazaqstan Respýblıkasy Premer-mınıstriniń orynbasary — mádenıet jáne aqparat mınıstri Aıda Balaeva mýzeı salasy eldiń mádenı-rýhanı damýy men tarıhı murasyn saqtaý úshin erekshe mańyzdy ekenin atap ótti.
Onyń aıtýynsha, búginde jahandaný men tsıfrlandyrý úderisi mádenıet salasyna da jańa talaptar júktep otyr. Osy oraıda Memleket basshysy mádenı murany tsıfrlandyrýǵa erekshe kóńil bóletini de sóz etildi.
— Ulttyq muramyzdy saqtaý, ǵylymı aınalymǵa engizý jáne keń aýdıtorııaǵa qoljetimdi etý — memleketimizdiń mádenı saıasatynyń basym baǵyttarynyń biri. Mýzeı salasyn tsıfrlandyrý onyń halyqaralyq deńgeıde tanylýyna jáne nasıhattalýyna erekshe áser eteri sózsiz, — dedi Aıda Balaeva.
Qazirgi kezde Qazaqstanda 280-den astam respýblıkalyq, óńirlik mýzeı jáne mýzeı-qoryqtar jumys isteıdi. Mýzeı qorlarynda 4,5 mıllıonnan astam eksponat saqtalǵan. Mýzeılerge jyl saıyn 6 mıllıonnan astam adam keledi. E-museum portaly elimizdegi mýzeı qorlaryn biryńǵaı tsıfrlyq platformaǵa biriktiredi. Joba mádenı qundylyqtardy ǵylymı turǵyda sıpattaýdy jáne halyqaralyq mádenı keńistikte tanystyrýdy maqsat etedi.
Sonymen qatar, bul portal sheteldik mýzeılermen, ǵylymı ortalyqtarmen jáne mádenı uıymdarmen aqparattyq jáne ǵylymı yntymaqtastyqty damytýǵa yqpal etedi. Joba kezeń-kezeńimen júzege asyrylyp, naqty nátıjeler kórsetti. 2023 jyly júıege 33 mýzeı qosyldy. 15 myńnan astam mýzeı eksponaty tsıfrlyq formatqa kóshirildi. 50 úshólshemdi model jasaldy. 2024 jáne 2025 jyldar qorytyndysy boıynsha júıege elimizdiń memlekettik mýzeıleri tolyq endi. Júıege Qazaqstannyń barlyq 20 óńirinen 252 mýzeı qosyldy. Tsıfrlyq katalogqa 66 myńnan astam mýzeı qorynyń birligi endi. 750 úshólshemdi model ázirlendi. Kórermenge arnalǵan mýzeı ekspozıtsııalarynan turatyn 15 vırtýaldy týr bar. Joba óńirlik mýzeılerdiń áleýetin arttyryp, qashyqtyqqa qaramastan mádenı murany qoljetimdi etýge múmkindik beredi. E-museum jobasynyń damýy Qazaqstannyń halyqaralyq mádenı ımıdjin nyǵaıtýǵa sep bolady.
Budan buryn QR Іshki ister mınıstriniń orynbasary Sanjar Ádilov qazaqstandyq mýzeılerdegi qaýipsizdik sharalary týraly aıtyp berdi.