Astanada Qazaqstan men Túrikmenstan arasyndaǵy jańa kelisimderge qol qoıyldy
ASTANA. KAZINFORM — Úkimetaralyq komıssııanyń kezekti otyrysynda Qazaqstan-Túrikmen yntymaqtastyǵynyń qazirgi jaǵdaıy men damý perspektıvalary qaraldy. Bul týraly Úkimettiń baspasóz qyzmeti habarlady.
Premer-mınıstrdiń orynbasary – Qazaqstan Respýblıkasynyń Úkimeti Apparatynyń basshysy Ǵalymjan Qoıshybaev pen Túrikmenstan Mınıstrler kabıneti tóraǵasynyń orynbasary Nókerǵuly Ataǵulyevtiń teń tóraǵalyǵymen Ekonomıkalyq, ǵylymı-tehnıkalyq jáne mádenı yntymaqtastyq jónindegi Qazaqstan-Túrikmen úkimetaralyq komıssııasynyń 14-otyrysy ótti.
Taraptar saýda-ekonomıkalyq yntymaqtastyq pen ónerkásiptik kooperatsııa, aýyl sharýashylyǵy, kólik-logıstıka, munaı-gaz salalaryn jáne bilim berý, mádenıet máselelerin talqylady.
QR vıtse-premeri Ǵalymjan Qoıshybaev Qazaqstan ekijaqty qatynastardyń barlyq baǵytyn damytýǵa daıyn ekenin atap ótti. Otyrys qorytyndysy boıynsha tıisti hattamaǵa qol qoıyldy.
Komıssııa otyrysynyń aıasynda eki eldiń memlekettik organdarynyń, damý ınstıtýttary men isker toptarynyń ókilderin biriktirgen Qazaqstan-Túrikmen bıznes-forýmy ótti. Іs-sharaǵa 40-qa jýyq túrikmendik jáne 100 qazaqstandyq kompanııa qatysty.
Bıznes-forým qorytyndysy boıynsha birqatar ekijaqty qujatqa qol qoıyldy:
- «QazTrade» SSDO» AQ men Túrkimenstannyń ónerkásipshileri men kásipkerleri odaǵy arasyndaǵy ózara is-qımyldy damytýdy kózdeıtin yntymaqtastyq týraly memorandým;
- «Silk Way Asia Trade» JShS men «Hazar Logistik» QQ arasynda, sondaı-aq «Silk Way Asia Trade» JShS men JK «Gamma»arasynda elektrondyq kommertsııa salasyndaǵy yntymaqtastyq týraly ýaǵdalastyqtar;
- «Ashra Solutions» JShS men «Ojar Aziýa» JK arasynda ınvestıtsııa-qurylys salasyndaǵy yntymaqtastyq týraly kelisim.
Aıta ketelik Qazaqstannyń Túrikmenstanǵa aýyl sharýashylyǵy taýarlary eksportynyń kólemi ósken edi.
