Astanada Qazaqstan men Tájikstan arasyndaǵy Úkimetaralyq komıssııanyń 19-otyrysy ótti

ASTANA. KAZINFORM — Búgin Astana qalasynda Qazaqstan men Tájikstan arasyndaǵy ekonomıkalyq yntymaqtastyq jónindegi Úkimetaralyq komıssııanyń 19-otyrysy ótti. Jıynǵa Qazaqstan Respýblıkasy Premer-mınıstriniń birinshi orynbasary Roman Sklıar jáne Tájikstan Respýblıkasy Premer-mınıstriniń birinshi orynbasary Hokım Holıkzoda teń tóraǵalyq etti.

Plenarlyq otyrysta sóz sóılegen Roman Sklıar atalǵan komıssııa Qazaqstan men Tájikstan arasyndaǵy ózara is-qımyldyń mańyzdy quralyna aınalǵanyn atap ótti. Onyń aıtýynsha, kún tártibinde ekijaqty qatynastardy odan ári tereńdetý, joǵary deńgeıde qol jetkizilgen ýaǵdalastyqtardy júzege asyrý, sondaı-aq ınvestıtsııalyq áleýet pen óńiraralyq baılanystardy keńeıtý máseleleri bar.

Óz kezeginde Hokım Holıkzoda bul formattaǵy kezdesýlerdiń eki el arasyndaǵy saýda-ekonomıkalyq jáne mádenı-gýmanıtarlyq baılanystardy jandandyrýǵa tyń serpin beretinin aıtty.

Komıssııa otyrysy barysynda taraptar saýda, ónerkásiptik kooperatsııa, aýyl sharýashylyǵy, kólik jáne logıstıka salalaryndaǵy yntymaqtastyqty damytý máselelerin talqylady.

Roman Sklıar komıssııa jumysy aldaǵy joǵary deńgeıdegi kezdesýlerdi sapaly daıyndaýǵa baǵyttalýy tıis ekenin atap ótti.

Taraptar qabyldanǵan sheshimder ekijaqty ózara is-qımyldy barlyq baǵyttar boıynsha nyǵaıtýǵa jáne tereńdetýge yqpal etetinine senim bildirdi.

Otyrys qorytyndysy boıynsha tıisti hattamaǵa qol qoıyldy.

Ekonomıkalyq yntymaqtastyq jónindegi Úkimetaralyq komıssııanyń kelesi, 20-otyrysy 2026 jyly Tájikstanda ótedi.

Aıta keteıik, Tájikstan qazaqstandyqtarǵa 100 bilim grantyn bóldi.