Astanada Qazaqstan men Taıland arasyndaǵy Devıs kýbogy matchynyń jerebesi tartyldy
ASTANA. KAZINFORM — Astanada Devıs kýbogynyń II álemdik toby aıasynda Qazaqstan men Taıland quramalary arasyndaǵy matchtyń resmı jerebe tartý rásimi ótti. Onyń qorytyndysy boıynsha jekeleı jáne juptyq kezdesýlerdiń ótý reti anyqtaldy.
Match 18–19 qyrkúıek kúnderi Astanadaǵy Beeline Arena Ulttyq tennıs ortalyǵynyń korttarynda ótedi. Jarystyń alǵashqy kúni, 18 qyrkúıekte, eki jekeleı kezdesý ótedi.
Alǵashqy matchta Aleksandr Shevchenko Maksımýs Parapol Djonspen kezdesedi. Odan keıin kortqa Tımofeı Skatov pen Kasıdıt Samreı shyǵady.
Ekinshi oıyn kúni, 19 qyrkúıekte, jarys baǵdarlamasy juptyq kezdesýmen bastalady.
Qazaqstan atynan Denıs Evseev pen Beıbit Jýkaev óner kórsetedi. Olarǵa Tanapet Chanta men Prýchıa Isaro qarsylas bolady.
Juptyq matchtan keıin taǵy eki jekeleı kezdesý josparlanǵan. Aleksandr Shevchenko Kasıdıt Samreımen, al Tımofeı Skatov Maksımýs Parapol Djonspen oınaıdy.
Match qarsańynda qazaqstandyq tennısshiler aldaǵy kezdesýge daıyndyǵy men juptyq saıysqa degen kóńil kúıi týraly aıtyp berdi.
— Men bul Devıs kýbogyna shamamen úsh apta daıyndaldym. Denıs ekeýmizdiń Taıland quramasyna qarsy kezdesýimizdi asyǵa kútip júrmin. Biz jaqsy daıyndyq júrgizdik, jattyǵý setterin oınap, túrli jattyǵýlar oryndadyq. Jalpy, ózimdi kortta jaqsy sezinemin jáne sapaly oıyn kórsete alamyz dep úmittenemin, — dedi Beıbit Jýkaev.
Onyń juptyq syndaǵy seriktesi Denıs Evseev komanda óz múmkindikterin tolyq kórsetip, oń nátıjege qol jetkizýge nıetti ekenin atap ótti.
— Bıylǵy jyl biz úshin ońaı bolǵan joq. Aqpan aıynda jeńiliske ushyradyq, endi sol kezdesýden durys qorytyndy shyǵaryp, óz múmkindikterimizdi kórsetý mańyzdy. Beıbit ekeýmiz bir-birimizdi burynnan jaqsy tanımyz, jekeleı de, juptyq synda da talaı ret birge oınadyq. Kortta bir-birimizdi jaqsy túsinemiz jáne bul bizdiń artyqshylyǵymyz dep oılaımyn. Bar múmkindigimizdi paıdalanyp, jeńiske jetý úshin bar kúshimizdi salamyz, — dedi Denıs Evseev.
Eske salaıyq, Qazaqstan men Taıland arasyndaǵy matchtyń jeńimpazy Devıs kýbogynyń I álemdik tobynda óner kórsetý quqyǵyna ıe bolady.
Matchtar 18 qyrkúıekte Astana ýaqytymen saǵat 13:00–de, al 19 qyrkúıekte saǵat 12:00–de bastalady.
Aıta ketelik Qazaqstan quramasy Devıs kýbogindegi mańyzdy match aldynda túsinikteme bergen edi.
